Прэм'ера мілагучнай оперы з крымінальным сюжэтам - у Вялікім тэатры. Музей пад адкрытым небам на плошчы Якуба Коласа і шорт-ліст работ беларускіх мастакоў.
Плануем культурныя выхадныя з Ларысай Гулякевіч. Опера "Сельскі гонар" П’етра Масканьі ўваходзіць у так званы "залаты" рэпертуар. Яна больш за стагоддзе з поспехам ідзе ва ўсіх тэатрах свету, а ў Вялікім беларускім ставіцца чацвёрты раз. Новая прэм'ера - у гэтую нядзелю.
Рэпетыцыі з раніцы да ночы. Новую версію оперы Масканьі рэжысёр Міхаіл Панджавідзэ назваў Крымінальным чытвом, ці псіхалагічнай крымінальнай музычнай драмай на ўсе ўзросты. Ёсць у спектаклі і асаблівасці, якіх раней ніхто не заўважаў.
"Шорт-ліст»" - так называецца выстава мастакоў, якія прэтэндуюць на званне лаўрэата ў конкурсе "Нацыянальная прэмія ў галіне выяўленчага мастацтва". Слава звычайна дастаецца толькі пераможцам, а тут больш за 60 работ у розных жанрах і кірунках.
Такі конкурс у Беларусі праводзіцца ўпершыню. Вынікі будуць аб’яўлены 18 мая ў Палацы мастацтваў. 10 намінацый: жывапіс, графіка, скульптура, дэкаратыўна-прыкладное мастацтва, арт-дызайн, фатаграфія, малады мастак, крытыка, мастацтвазнаўства і навацыя.
Традыцыйны праект "Мастак і горад" у выглядзе маштабных рэпрадукцый адкрыўся пад адкрытым небам на плошчы Якуба Коласа. Сёлета прадстаўлены работы мэтраў - "Залатая калекцыя".
Такі музей у фармаце "опэн эйр" прымушае розных людзей апынуцца сярод лепшых твораў прадстаўнікоў беларускага жывапісу і графікі з калекцыі Нацыянальнага цэнтра сучасных мастацтваў.
У нядзелю на тэрыторыі Верхняга горада свята беларускай культуры "Вытокі". Увесь дзень спевы, танцы, народная творчасць. Нясумных выхадных і да наступнай пятніцы.
