Як культурна правесці час у выхадныя? Сакрэты закадравага здымачнага працэсу – у выставе найстарэйшага мастака тэлебачання і кіно Міхаіла Карпука. Ансамбль "Камерныя салісты Мінска" адзначае свае 15 гадоў канцэртам Баха на старажытных інструментах.
Экскурс самых цікавых культурных падзей сталіцы - у Ларысы Гулякевіч. У кадры і за кадрам здымачнага працэсу. Графічныя работы найстарэйшага беларускага мастака кіно і тэлебачання Міхаіла Карпука ў Нацыянальным мастацкім музеі Беларусі.
Імя Міхаіла Андрэевіча Карпука ўжо ўпісана ў гісторыю беларускага мастацтва. Больш за 25 гадоў ён як мастак-пастаноўшчык прысвяціў Беларускаму тэлебачанню і кінематографу. Яго афармленне канцэртных праграм эстраднага і класічнага жанраў, тэлевізійных перадач і спектакляў, кароткаметражных і шматсерыйных мастацкіх фільмаў – сёння класіка і прыклад для работы ў гэтых жанрах.
Шэсць Брандэнбургскіх канцэртаў Баха ўпершыню будуць выконвацца на сцэне Белдзяржфілармоніі на тых інструментах, для якіх пісаў кампазітар. Такім незвычайным канцэртам ансамбль "Камерныя салісты Мінска" адзначае 15 гадоў свайго існавання.
"6 канцэртаў для розных інструментаў" у 1721 годзе Іаган Себасцьян Бах напісаў для маркграфа Брандэнбургскага Крысціяна Людвіга. Гэтымі знакамітымі творамі нямецкага кампазітара і адзначае 15-гадовы дзень нараджэння ансамбль "Камерныя салісты Мінска" ў субботу 19 лістапада.
Авангардная румынская скульптура і мастацка-графічныя работы беларусаў. Сумесная выстава - своеасаблівая даніна павагі тым працэсам, якія адбываліся ў пачатку XX стагоддзя ў Еўропе.
У мастацкім свеце абстрактная скульптура перш за ўсё асацыіруецца з работамі румынскага скульптара Канстанціна Брынкуша – заснавальніка гэтага напрамку ў пачатку XX стагоддзя. Менавіта гэтаму сусветна вядомаму творцу, а дакладна 140-годдзю з дня яго нараджэння, і прысвечана выстава ў мастацкай галерэі Савіцкага. У экспазіцыі работы як сучасных румынскіх майстроў, так і беларускіх.
А вось беларускую скульптуру – праект пад назвай "Неба і зямля" - можна ўбачыць у арт-гасцёўні "Высокае месца". Нясумных выхадных і да наступнай пятніцы.
