Полацк вось ужо трэці раз прымае Дні беларускай пісьменнасці. Гэтым вечарам адбудзецца афіцыйная цырымонія адкрыцця свята роднага слова, хоць урачыстасці разгарнуліся яшчэ ўчора. Праграма сапраўды насычаная. Сярод сотняў мерапрыемстваў - выставы, круглыя сталы, прэзентацыі, канферэнцыі, канцэрты, літаратурныя чытанні. Зараз у Полацку працуе здымачная група Агенцтва тэленавін. На сувязі - карэспандэнт Іна Пілевіч (прамое ўключэнне).
Гэтымі хвілінамі школьнікі з розных куткоў краіны спаборнічаюць у мастацтве дэкламацыі вершаў. У Полацкім палацы культуры праходзіць фінальны этап конкурсу юных чытальнікаў «Жывая класіка». Праект ладзіцца ўжо пяты сезон і гэтым разам аб'яднаў больш за 13 тысяч школьнікаў.
Але шчаслівы білет на фінал у Полацк атрымалі толькі 28 канкурсантаў. Удзельнікаў ацэньваюць вядомыя літаратары. Сярод крытэрыяў адбору - глыбіня пранікнення ў вобраз і сэнс твора, артыстызм выканання. Трыумфатар праекта выступіць на заключным канцэрце Дня пісьменства, які адбудзецца ўжо заўтра. А літаральна гадзіну таму ў Музеі беларускага кнігадрукавання завяршыўся міжнародны круглы стол. У ім прынялі ўдзел делегаты 12 краін. Пісьменнікі, выдаўцы, навукоўцы абмяркоўвалі такое паняцце, як дыпламатыя слова, грунтуючыся на спадчыне Францыска Скарыны. Сімвалічна, што Полацк з'яўляецца радзімай усходнеславянскага першадрукара, і сёлета наша краіна адзначае 500-годдзе з моманту публікацыі Скарынам Бібліі. Прашу рэжысёраў паказаць урывак інтэрв'ю аднаго з удзельнікаў.
Апроч дня роднага слова, Полацк святкуе і свой дзень нараджэння. Аднаму з самых старажытных гарадоў Беларусі спаўняецца 1155. Менавіта тут зарадзілася беларуская дзяржаўнасць. З гэтай нагоды а 18 гадзіне ля Сафійскага сабора адбудзецца адкрыццё памятнага знака «Полацк - калыска беларускай дзяржаўнасці». Помнік уяўляе сабой бронзавыя шчыты з выявамі гістарычных персаналій, лёс якіх завязаны з Полацкам. Праграма свята сапраўды насычаная. З раніцы працуюць шматлікія выставы, праходзіць фестываль кнігі і прэсы.
Адсвяткаваць дзень роднага слова можна і на радыёхвалях. Канал «Культура» пачаў двухдзённы марафон. Каманда радыйшчыкаў ужо разгарнула мабільную студыю ля помніка Францыску Скарыну ў Полацку. Адтуль будуць весціся прамыя ўключэнні кожныя дзве гадзіны. Так што, далучайцеся!