Жанчына, для якой яе ўзрост - гонар. Сёння адзначае юбілей Бэла Масумян. Прыме Рускага тэатра - 80! З юбілеем народную артыстку Беларусі павіншаваў Прэзідэнт Аляксандр Лукашэнка. Свой дзень нараджэння актрыса адзначае ў рабочым рэжыме - на сцэне.
Расказвае Наталля Бардзілоўская.
У яе працоўнай кніжцы - адзіны запіс: 1961 год, выпускніца Беларускага тэатральна-мастацкага інстытута Бэла Масумян прынята ў штат Акадэмічнага драматычнага тэатра імя Горкага. З тых часоў бесперапынна, больш за паўстагоддзя на сцэне Рускага. І сёння, у свой юбілей, у зайздроснай і фізічнай, і творчай форме, грае ў сённяшнім рэпертуары, рэпеціруе новую п’есу. Прэм’ера - у кастрычніку!
Гэта будзе камедыя. Сучасная драматургія амерыканца Дэвіда Крыснера «Гарачыя матулі». А пакуль да юбілею Масумян выходзіць у адным з любімых спектакляў – “Сыходзіў муж ад жонкі” ў пастаноўцы Барыса Луцэнкі паводле п’есы Злотнікава - з дзясятак гадоў. Гісторыя на дзве асобы. Драму, абразу, каханне і боль сваёй гераіні Масумян кожны раз перажывае, як уласныя, з плачам, на разрыў душы.
Нарадзілася на Украіне. Гімназію скончыла ў Літве. Паступала ў Шчэпкінскае вучылішча. Шмат дзе падарожнічала і жыла, але засталася ў Мінску. Кінакар’ера за выключэннем пары стужак не стала яе. Затое за тэатральнае жыццё Масумян прымерыла на сябе каля сотні роляў у спектаклях ад дзіцячых казак да псіхалагічных драм. Уладальніца ўсіх магчымых нацыянальных тэатральных адзнак, медаля Францыска Скарыны, спецпрэміі Прэзідэнта дзеячам культуры і мастацтва. Непаўторную, у Рускім яе называюць працягвальніцай традыцыі Аляксандры Клімавай. Яркай фарбай і сімвалам тэатра.
Яна не сядзіць на дыетах і не займаецца спортам. Сакрэт доўгіх і насычаных гадоў - у генетыцы, лічыць актрыса. Яе матуля перасягнула 100-гадовы ўзрост. Не састарэць Масумян дапамагае і прафесія. У ёй шкада страт: пайшлі Янкоўскі, Клімава, Сідараў. Але ж менавіта тэатр дае сілы для жыцця.
