Галоўныя музычныя падмосткі краіны ператварылі ў ігральную залу. На сцэне Нацыянальнага акадэмічнага тэатра оперы і балета размясцілі стол для картачных гульняў, а ў аркестравай яме падрыхтаваліся іграць Чайкоўскага. Усё гэта для сённяшняй прэм'еры оперы Пікавая дама, якую мінскай публіцы прапануе балгарскі рэжысёр.
На генеральным прагоне чаканай прэм'еры пабывала Юлія Лосікава.
Оперу Пікавая дама Пётр Ілліч Чайкоўскі напісаў за 44 дні. Запрошанаму рэжысёру Пламену Карталаву для пастаноўкі ў Вялікім давалася прыкладна столькі ж часу. Прасякнутая містыкай і каварствам пастаноўка паказвае простыя чалавечыя пачуцці, якія будуць зразумелыя сучаснаму гледачу.
Трагедыя трох карт ізноў на сцэне Вялікага. Сёмая ў гісторыі тэатра пастаноўка Пікавай дамы сёння зноў будзе паказаная сталічнаму гледачу. Гэтым разам пастаноўшчыкам выступіў сафійскі рэжысёр Пламен Карталаў, для якога опера Пікавая дама - гэта стык рэальнасці і містыкі. І, вядома ж, вера ў поспех.
Пламен Карталаў, рэжысёр-пастаноўшчык (Балгарыя): Веру ў поспех. Гэта старажытнагрэчаскі прынцып наканавання, які вырашае вельмі многія крокі ў чалавечым лёсе. Глядач не ўбачыць руцінны спектакль. Глядач убачыць сучасны спектакль. І зразумее, што Чайкоўскі і Пушкін - гэта звышгеніяльны саюз.
Пламен Карталаў разам з пастановачнай групай тэатра пакажа гледачу падвойны свет галоўнага героя. Рэальнасць змяшалася з ілюзіямі і фантазіямі Германа.
Па традыцыі ў пастаноўцы два акцёрскія склады. Тэнаровыя арыі Германа, які выконвае са сцэны: Что наша жизнь? Игра!, - можна пачуць на прэм'еры. Гэтак жа, як і ўбачыць нечаканы фінал, далёкі ад пушкінскага арыгінала.
