Аднаактовы балет "Маленькая смерць" пакажуць у першы дзень вясны. Яго стварылі ў год, калі з дня нараджэння геніяльнага аўстрыйскага кампазітара Моцарта споўнілася 260 гадоў. На сцэне - вядучыя салісты, народныя і заслужаныя артысты.
Балетаманы называюць яго харэографам "залатое вуха". Даследуючы глыбіні чалавечай натуры больш, чым фізічныя магчымасці цела, Іржы Кіліян зарабіў устойлівую рэпутацыю харэографа-філосафа. З-за складанасці выканання яго пастаноўкі падуладныя толькі высокапрафесійным калектывам.
Ігар Артамонаў, народны артыст Беларусі, вядучы майстар сцэны Вялікага тэатра Беларусі: "Вялікае дасягненне для Вялікага тэатра і гэта шэдэўр сусветнай харэаграфіі, які ўпрыгожыў наш рэпертуар. Гэта адзін з самых надзвычайных спектакляў, які быў пастаўлены, скажам так, у найноўшую гісторыю".
Каб зрабіць пастаноўку ў дакладнасці, як арыгінал, за месяц да прэм'еры ў Мінск прыехала адна з асістэнтаў, правая рука Кіліяна. Харэаграфія ўвасобленая да кроплі, за выключэннем нюансаў. У Вялікім тэатры сцэна ўсталяваная пад вуглом 4 градусы і рапіры, з якімі танцуюць мужчыны, не ляжаць як трэба, таму ўнеслі лёгкія карэктывы.
Адсутнасць звыклых пуантаў, гарсэтаў і балетных пачак - адна з асаблівасцяў гэтай пастаноўкі. Для копіі спектакля на адзін дзень з Францыі былі прывезеныя арыгіналы касцюмаў. Спецыяльна падабраная тканіна і індывідуальны крой для найбольшай зручнасці. Цела артыстаў максімальна адкрытае, на іх толькі шорты і ліфы, але на мінімалістычныя ўборы спатрэбілася нямала працы. 26 камплектаў і чатыры бальныя сукенкі былі пашытыя ў тэатральных майстэрнях усяго за тыдзень.
Танец шасці жанчын, шасці мужчын і шасці рапір заўсёды актуальная тэма супрацьстаяння палоў. Зброя - сімвал сілы і ўлады, крыналінавыя сукенкі на кольцах - як фальшывая цнатлівасць, ну і, вядома, прыгажосць адносін мужчыны і жанчыны - у кожнага гледача атрымаецца свая трактоўка.
"Маленькая смерць" ідзе ў тандэме з дзеючымі пастаноўкамі. Сцэна "Цені" з "Баядэркі", а таксама "Шэсць танцаў" і "Маленькая смерць" са знакамітай праграмы Кіліяна "Чорна-белыя балеты" дапаўняюць адно аднаго ў эмацыянальным і стылістычным кантрасце.
У планах Вялікага стварыць вечар харэаграфіі Іржы Кіліяна. Туды ўвойдуць ужо ўвасобленыя пастаноўкі і спектаклі, якія беларуская публіка яшчэ не бачыла.
