Аляксандр Цітэль прыехаў у Мінск для работы над операй "Багема" італьянскага кампазітара Джакама Пучыні. Народны артыст Расіі ўжо прэзентаваў сваю канцэпцыю спектакля мастацкаму савету Вялікага тэатра Беларусі. Якой будзе маючая адбыцца прэм'ера - эксклюзіў у рэпартажы Іны Пілевіч.
Кастынг сярод "сваіх". У Вялікім тэатры Беларусі - праслухоўванне на выкананне галоўных партый у оперы Пучыні "Багема". У чаканні свайго выхаду хвалююцца нават заслужаныя артысты. Бо трупу ацэньвае ўладальнік чатырох "Залатых масак" Аляксандр Цітэль. Народны артыст Расіі і мастацкі кіраўнік маскоўскага тэатра Неміровіча-Данчанкі ўпершыню ставіць спектакль у Мінску.
У Вялікім праспяваюць Далі, Ван Гог і Мадэльяні. Вакалістаў пераўвасобяць у культавых мастакоў пачатку мінулага стагоддзя. Апроч майстроў пэндзля, на сцэне паэты, філосафы, музыканты, адным словам, багема, якой і прысвяціў сваю музыку італьянец Пучыні. Сюжэт адной з касавых опер у гісторыі закручваецца вакол парыжскай творчай інтэлігенцыі. Бедная эліта марыць пра грошы і славу.
Класіку пададуць сучасна. Галоўнай дэкарацыяй стане экранная тканіна, на якую будзе праецыявацца відэа. Такі мінімалізм не зменшыць дынамікі сюжэту. Для насычанага малюначка каманда маскоўскіх мастакоў падрыхтавала паўсотні эскізаў. Іх адскануюць і анімуюць. Багему пададуць у стылі мадэрн. Так аб'ёмныя дэкарацыі будуць паказаныя ў выглядзе разабранага інтэлігента. Тут і вусны-канапа Далі, і ногі Магрыта.
Быць або не быць мадэрнавай багеме - вырашаць мастацкаму савету, у складзе якога - ад дырэктара да начальніка мастацка-пастановачнай службы. Для прэзентацыі сваёй ідэі Аляксандр Цітэль упадабаў прасторны хол, бо ніводны кабінет не здольны змясціць такую колькасць эскізаў. На суд калегіума прапанаваны і макет сцэны. "Багему" на нашай сцэне да гэтага сезона ставілі двойчы.
Мастацкі савет Вялікага тэатра сказаў "так" "Багеме" Цітэля. Гэта значыць, маляўнічыя, дэкарацыйныя і швейныя цэхі тэатра ўжо пачынаюць рэалізацыю ідэй каманды пастаноўшчыкаў. Артысты ў сваю чаргу занятыя вывучэннем партый. Рэпетыцыі ж з маскоўскім рэжысёрам пачнуцца толькі ў сакавіку. Прэм'ера новай версіі оперы Пучыні прызначаная на 25 красавіка.
