Падрабязнасці апошніх падрыхтовак да еўратыдня з "Мінск-Арэны"

18 ноября 2018

У Мінск з'язджаюцца ўдзельнікі дзіцячага конкурсу песні "Еўрабачанне". А на "Мінск-Арэне" вось ужо два тыдні працуе каманда Белтэлерадыёкампаніі, дапамагаюць якой вопытныя замежныя еўравізіёншчыкі. Зманціравана сцэна, выстаўлена святло, наладжаны гук, размешчана здымачная тэхніка, і ўсё гэта зараз даводзіцца да дасканаласці, рыхтуюцца са статыстамі нумара кожнай з 20 краін-удзельніц. Спецыфіка шоу такога маштабу ў тым, што ўсё тут - ад распарадку дня ўдзельнікаў, графіку працы нашай каманды да самога фіналу - распісана дэталёва. Яшчэ да пачатку трансляцыі кожная з задзейнічаных асоб будзе ведаць, што павінна адбыцца ў тую ці іншую секунду на сцэне, і як гэта павінна быць паказана ў эфіры.

Наш карэспандэнт Ніна Мажэйка ўсе гэтыя дні літаральна жыве на "Мінск-Арэне". У яе ўсе падрабязнасці апошніх падрыхтовак да еўратыдня.

Піяніна - гэта першы рэквізіт, які з'явіўся на сцэне дзіцячага "Еўрабачання".

Пастаменты, таблеткі, спецыфічныя дэкарацыі па індывідуальным заказе пад кожны нумар дэлегацыі прывозяць з сабой.

Задача максімум - падрыхтаваць выступленне кожнай краіны практычна на 100 %. У гэтым дапамагаюць статысты - тэхнічныя дублёры канкурсантаў. Па іх выстаўляюць неабходныя параметры здымкі, кантэнту, святла і гуку.

Стэдык - гэта стадыкам. Дынамічная камера, якая ў літаральным сэнсе суправаджае артыстаў на сцэне. А 3-яя - нумар камеры. Усяго іх 14 на сцэне і яшчэ 2 у грын-руме.

Калі нашы аператары - вочы конкурсу, то Марэк Міл з Эстоніі - мозг. Менавіта ён вырашае, на якой з камер запаліцца чырвоная лямпачка. Яго каманды самыя важныя. Для таго каб сувязь была максімальна прамой, у ПТС у рэжысёра нават камеры падпісаны пайменна.

На такой сцэне ёсць дзе разгуляцца фантазіі. Каманда рэалізуе любую. Параметры касмічныя не толькі з-за размаху (памеры галоўнай пляцоўкі тэлешоу ўражваюць), але яшчэ з-за святла. Яго будзе шмат.

Зараз сцэна выглядае абсалютна гатовай, але гэта толькі для непрафесіянала. Насамрэч на ёй яшчэ будуць невялікія змяненні. Зоны, дзе будзе размяшчацца масоўка і подыумы, задрапіруюць у чорны колер - сапраўдная знаходка для тэлевізіёншчыкаў, бо дзіцячае "Еўрабачанне" - гэта тэлевізійны конкурс.

Пляцоўка конкурсу ператворыцца ў паўнацэнны здымачны павільён. Для гэтага ўсе зоны, якія трапяць у кадр, задэкарыруюць у чорны колер.

Гордан Банела, шоу-дырэктар дзіцячага конкурсу песні "Еўрабачанне-2018": "Еўрабачанне" - гэта як складаная машына са мноствам дэталяў, якія трэба сабраць у пазл. Мы павінны быць гатовыя абсалютна да ўсяго".

Механізм прыведзены ў дзеянне - зваротны адлік запушчаны. Але нават у рэжыме нон-стоп знаходзіцца час для амаль сямейных цырымоній на вялікай сцэне. Вялікай камандай павіншавалі імянінніка - шоу-дырэктара з Мальты Гордана Банела. Для яго гэта дзіцячае "Еўрабачанне" ўжо пятае.