Мэту іх візіту - адпачынак і новыя ўражанні. Першая камерцыйная група турыстаў з Кітая прыехала ў Беларусь. Пакуль на 6 дзён. Наступны візіт можа стаць больш працяглым. У святле будучых Еўрапейскіх гульняў гасцям з Кітая плануюць дазволіць 30-дзённы бязвізавы ўезд. Усяго з моманту яго ўвядзення ў лютым у Беларусь прыехалі 52 тысячы турыстаў.
Сваімі ўражаннямі госці з Паднябеснай падзяліліся з нашым карэспандэнтам Наталляй Тарасюк.
Каб даведацца сакрэты рамёстваў, гэтыя госці пераадолелі амаль 10 тысяч кіламетраў. Першая камерцыйная група турыстаў з Кітая - гэта 15 чалавек паважанага ўзросту: ад 60 і больш. У многіх і самавіты вопыт падарожжаў.
Цзен Су Дун, турыст, Кітай:
"Я быў больш як у 50 краінах свету. Нават у Расіі, Украіне, Польшчы і Прыбалтыцы. Першае, што хочацца сказаць аб Беларусі, яна дзіўна прыгожая".
Кожную хвіліну экскурсіі кітайскія турысты фіксуюць на камеру. Каб выкласці, напрыклад, у WeChat. 67-гадовая Ля Ян паказвае, колькі лайкаў і каментарыяў сабралі здымкі з Беларусі.
Важкім аргументам стане і бязвізавы ўезд. Улічваючы будучыя Еўрапейскія гульні, новая прапанова для гасцей з Кітая - 30 дзён. Спаборніцтвы стануць выдатным прыкладам падзейнага турызму. І вырашальным фактарам, каб выбраць для адпачынку менавіта Беларусь.
Усе спрашчэнні - толькі плюс і для бюджэту, і для іміджу краіны. Бо толькі ў 2016 у паездках кітайскія падарожнікі (а гэта 135 мільёнаў чалавек) пакінулі за мяжой сваёй краіны 216 мільярдаў долараў.
У музейным комплексе прызнаюцца, што турысты з Кітая не рэдкасць. Гэта дзелавыя людзі, якія проста ўключылі пару месцаў для наведвання ў сваю праграму. Такая турыстычная група і ў Беларусі, і ў гэтым комплексе ўпершыню. Але аб'ядноўвае гасцей з Паднябеснай адно - больш за ўсё яны любяць інтэрактыў у экскурсіях.
Гэтая група ўбачыць і спазнае Беларусь не толькі гістарычную, але і ваенную, сучасную, запаведную. З шасці дзён тура тры ўжо ў мінулым. Заўтра іх чакае адно з самых атмасферных беларускіх месцаў - Нясвіжскі замак.
