Чатыры кабінеты былой Нарачанскай школы стануць важнай культурнай лакацыяй усёй краіны. Першая персанальная галерэя народнага мастака Беларусі Васіля Шаранговіча адкрыецца заўтра на яго малой радзіме. Пастаянная экспазіцыя - падарунак да Дня работнікаў культуры. На плошчы 200 квадратных метраў - больш за сотню арыгінальных работ майстра жывапісу і графікі. У рэтраспектыўным спісе - знакаміты цыкл пра Хатынь, маляўнічыя краявіды Мядзельшчыны, афармленне кніг Купалы, Коласа і Талстога. Сёння з майстэрні транспартуюцца апошнія работы.
Акрамя карцін, прадугледжана інтэрактыўная пляцоўка, дзе кожны зробіць экскурс у творчасць мэтра. Ініцыятарам адкрыцця праекта стаў Мінаблвыканкам. Галерэя - своеасаблівы адпраўны пункт культурнай арт-прасторы Мядзельшчыны. У будучыні там прадэманструюць персанальныя экспазіцыі пра пісьменніка Максіма Танка і актрысу Марыю Захарэвіч.