Сёння Беларусь адзначае 125 гадоў з дня нараджэння класіка нацыянальнай літаратуры Максіма Багдановіча. Па ўсёй краіне разгарнуліся ўрачыстыя мерапрыемствы і святочныя акцыі. Беларусы і госці ўспаміналі паэта, чыталі яго вершы, прыходзілі да помнікаў выказаць захапленне і ўшанаваць памяць. Віншаванні ўдзельнікам урачыстасцяў накіраваў Прэзідэнт Беларусі Аляксандр Лукашэнка.
Цэнтрам юбілейных урачыстасцяў сёння стала сталіца: горад, у якім Максім Багдановіч нарадзіўся. Раніцай у крыпце храма-помніка ў імя Усіх святых прайшла цырымонія "Вяртанне". У адну з ніш нацыянальнага пантэона змясцілі сасуд з зямлёй з магілы Багдановіча. Духоўныя асобы спецыяльна ездзілі ў Ялту, дзе пахаваны класік.
Тонкі лірык, вытанчаны рамантык. Паэтычныя прысвячэнні жанчынам і ў наш час з'яўляюцца вяршыняй беларускай лірычнай паэзіі. Пры гэтым паэту было крыху больш за 20. Сёння ж вершы Багдановіча прысвячалі самому Максіму. Каля помніка класіку на плошчы Парыжскай камуны, каля Вялікага тэатра Беларусі, прайшла літаратурная акцыя "Расцём разам з Максімам". На працягу некалькіх гадзін паэзію Багдановіча чыталі сотні людзей.
Пасля завяршэння паэтычнай акцыі ля манумента Максіма Багдановіча адбыўся мітынг "Пакланіся Максіму". Разам з удзельнікамі ўсенароднай акцыі да помніка былі ўскладзены кветкі і ад Кіраўніка дзяржавы.
Сёння ў Мінску да юбілейнай даты пасля некалькіх гадоў аднаўленчых работ адкрыўся музей Максіма Багдановіча. Наведвальнікам прапанавана абноўленая экспазіцыя з гістарычнымі дакументамі і найноўшымі мультымедыйнымі тэхналогіямі.