Калектыў з 85-годдзем павіншаваў Прэзідэнт Беларусі Аляксандр Лукашэнка. За гэтыя гады праз тэатр прайшоў парад айчынных зорак: Янкоўскі, Клімава, Асмалоўская. Святочным вечарам артысты зноў выйдуць на сцэну, каб павіншаваць і свайго гледача юбілейным канцэртам.
Расказвае Вольга Мядзведзь. З харальнай сінагогі да Нацыянальнага акадэмічнага драматычнага тэатра. Будынак па вуліцы Валадарскага больш чым за векавую гісторыю прымераў розныя амплуа. У трыццатыя гады тут быў спачатку працоўны клуб, а затым кінатэатр "Культура". Ужо тады гэтую залу з лепшай акустыкай у сталіцы для сваіх выступленняў выбіралі такія зоркі, як Уцёсаў, Маякоўскі, Лемешаў.
Сюды трупа пераедзе толькі пасля Другой сусветнай, з таго часу зменіцца і афіцыйная назва. А пачатак Горкаўскі бярэ ў Бабруйску. У трыццатыя гады мінулага стагоддзя аматарскі састаў вандроўных акцёраў ператварылі ў прафесійны Рускі тэатр БССР. Да мінскай прапіскі яшчэ больш за два дзясяткі гадоў ён пераязджаў у Магілёў, Маскву, Гродна.
У пяцідзясятых рэпертуарнае лідарства ў рускай класікі. Росквіт тэатра прыпадае на сямідзясятыя. На сцэне Клімава, Янкоўскі, Асмалоўская, рэжысіруе Луцэнка. "Макбет", "Трохграшовая опера", "Трагедыя чалавека" - пра гэтыя пастаноўкі гаварылі нават далёка за межамі Саюза.
Зараз у рэпертуары больш за трыццаць спектакляў на вялікай і малой сцэнах для дарослых і дзяцей. Зала прыкладна на 400 чалавек практычна заўсёды збірае аншлагі. У трупе як маладое акцёрскае пакаленне, так народныя Клебановіч, Ткачонак, Масумян і заслужаныя артысты.
