Усё пачалося са "Шчаўкунка". Менавіта на гэты спектакль маленькую Таню Яршову прывялі бацькі. З тых часоў яна і "захварэла" балетам. Вучылася ў Рызе - адначасова з Барышнікавым і Гадуновым, сярод педагогаў - сам Марыс Ліепа. Сёння народная артыстка Беларусі, педагог-рэпетытар Вялікага тэатра Таццяна Яршова адзначае юбілей. Пра жанчыну ў балеце - Алена Борматава.
Яна заўсёды ў балетным класе. Яе раніца штодня пачынаецца з заняткаў ля станка. Толькі зараз Таццяна Яршова - па той бок харэаграфічнага атрыбуту. Чэпкі, прафесійны погляд улоўлівае найменшыя недакладнасці ў рухах яе вучняў. Уласным прыкладам яна дэманструе, як зрабіць малюнак партыі бездакорным.
Яршова нарадзілася ў Латвіі. Мову танца спасцігала ў Рыжскім харэаграфічным вучылішчы. У адзін час з ёй вучыліся Барышнікаў і Гадуноў. Ёй рана давяралі сур'ёзныя партыі. Ужо ў 8 класе Яршова выконвае складаны Па дэ труа з "Лебядзінага возера". Такое і сёння могуць паўтарыць нешматлікія.
Лёгкі крок, выразная пластыка і фенаменальныя скачкі, за якімі тытанічная праца робяць юную балерыну адной з вядучых у сваёй прафесіі.
У беларускі Вялікі Яршову запрашаюць прама падчас правядзення Усесаюзнага моладзевага оперна-балетнага фестывалю. У Мінск балерына перабіраецца разам са сваім сцэнічным партнёрам Аляксандрам Мартынавым. Тут яна ператанцавала практычна ўвесь класічны рэпертуар. А пасля завяршэння кар'еры танцоркі, прыма-балерына працягвае служыць гэтаму тэатру ўжо ў якасці педагога-рэпетытара.
Тэхнічная віртуознасць, прафесійная ўпартасць і балетныя амбіцыі робяць Яршову адной з вядучых салістак нашага Вялікага. Як феномен сёння ў тэатры ўспамінаюць іспанскія гастролі, калі літаральна за некалькі хвілін балерына даведваецца, што будзе выконваць зусім іншую партыю.
Яна сыходзіць са сцэны даволі рана. Пенсія ў балерын, як правіла, пачынаецца яшчэ да 40. Галоўным становяцца вучні. Яна - як педагог, за кулісамі.
Сёння ў балетным класе адточваюць "Пахіту". Яе вучні будуць упершыню выконваць вядучыя партыі ў гэтым спектаклі. Прапрацоўваюць кожны крок, каб на сцэне ўсё было бездакорна - ад характарнасці ролі да найскладанейшых элементаў.
