Кітайскі рэстаранчык, індзейскі вігвам і каўбойскі бар з'явіліся ў Мінску. Такія дэкарацыі пабудавалі на базе "Беларусьфільма" спецыяльна для здымак новай стужкі Дзмітрыя Астрахана. Над стварэннем карціны "Жыццё пасля жыцця" ў сталіцы працуе міжнародная каманда. У галоўных ролях Аляксандр Дамагараў, Ганна Семяновіч, Таццяна Кабанава і Кірыл Сафонаў. На кінапляцоўцы інтэрнацыянальная масоўка: індзейцы, японцы, кітайцы, мексіканцы, рымляне, грэкі і шматлікія іншыя. Большасць толькі ў вобразах, створаных з дапамогай касцюмаў, грыму і парыкоў.
Здымкі праходзілі ва ўрбаністычных дэкарацыях Мінска. У поўным метры паўстануць плошча Якуба Коласа, Мастацкі музей, Вялікі тэатр, гістарычны цэнтр горада. Разгледзець нашы славутасці можна будзе ў 4-серыйнай тэлеверсіі і на вялікіх экранах кінатэатраў.
