Асаблівая ўрачыстая атмасфера ўсё больш ахутвае фестывальны Віцебск. На "Славянскім базары" сёння адкрыўся "Лялечны квартал". Першая ў афішы - пастаноўка паводле казкі "Брэменскія музыканты". Шматлюдна і ў выставачных залах. Дзверы расчынілі адразу некалькі вернісажаў.
І зараз слова нашаму віцебскаму карэспандэнту Вользе Маслоўскай. За дзень да афіцыйнага адкрыцця XXVIII Міжнароднага фестывалю мастацтваў "Славянскі базар" у Віцебску вырас "Лялечны квартал". Яго праграма аднолькава цікавая і дзецям, і дарослым. Праекту шэсць гадоў, і за гэты час тут пабывалі марыянеткі і лялькаводы з розных рэгіёнаў Беларусі, Расіі, Украіны, гастралявала трупа са Швецыі. Сёлета чакаюць калектывы з Маладзечна, Санкт-Пецярбурга і Рыбінска. Але першым у афішы, па традыцыі, стаіць спектакль "Брэменскія музыканты" ў выкананні віцебскай трупы.
"Брэменскія музыканты" - сапраўдны спектакль-доўгажыхар. Пастаноўка ідзе больш чым 20 гадоў, і заўсёды з аншлагам. Каханне - вечная тэма. Напэўна, таму і творчасць папулярнага спевака Эміна такая запатрабаваная. У глядзельнай зале аншлаг. На яркае шоу сёння а дзясятай гадзіне вечара ў Летні амфітэатр запрашае яшчэ адзін сэрцаед. Стас Міхайлаў на "Славянскім базары" не першы раз, але заўсёды жаданы госць. Білеты раскуплены.
Прыехаць на вячэрні канцэрт у Віцебск і на наступны дзень паспець на працу - такую магчымасць атрымалі жыхары Мінска. У дні фестывалю з беларускай сталіцы ў сталіцу фестывальную і назад пачаў курсіраваць дадатковы цягнік. Час руху "Славянскага экспрэса" складзены з улікам праграмы "Базару". Цягнік адпраўляецца з Мінска штодня ў 12 гадзін 42 хвіліны, час прыбыцця ў Віцебск - 16:18. З фестывальнай сталіцы ён адпраўляецца ўначы ў 1:30 і прыбывае ў Мінск раніцай у 5:52.
Не заблытацца ў фестывальных маршрутах гасцям "Славянскага базару" дапамагаюць валанцёры. Гэта каманда 200 чалавек. Самаму маладому 18 гадоў, самаму вопытнаму - 65. Яны апранутыя ў брэндаваныя майкі і ведаюць адказ на любое пытанне аб канцэртных пляцоўках, фестывальных службах і нават гатовы падказаць, на якой вуліцы больш шанцаў сустрэць зорку.
Заўтра асаблівы дзень і для валанцёраў, і для ўдзельнікаў, і, вядома, для арганізатараў фестывалю. Афіцыйны старт XXVIII Міжнароднага фестывалю мастацтваў "Славянскі базар у Віцебску" будзе дадзены ў Летнім амфітэатры падчас вялікага гала-канцэрта. Заўтра народнай артыстцы Украіны Таісіі Павалій будзе ўручана спецыяльная прэмія Прэзідэнта Беларусі "Праз мастацтва - да міру і паразумення", а яе імянная зорка запаліцца на Алеі зорак фестывалю.
