Пяць дзён да пачатку "Еўрабачання". Сёння на сцэне "Мінск-Арэны" пройдуць першыя рэпетыцыі ўдзельнікаў з 20 краін. Напярэдадні ў "БелЭкспа" афіцыйна адкрыўся еўратыдзень, дзе падчас жараб'ёўкі вызначылі першую і апошнюю пазіцыі, а таксама нумар выступлення краіны-гаспадыні. Адкрые шоу Дарына Краснавецкая з Украіны. Фінальныя акорды за Раксанай Венгель з Польшчы. А прадстаўнік Беларусі Даніэль Ястрэмскі паднімецца на сцэну восьмым.
Еўравізійны тыдзень афіцыйна пачаўся. Старт быў дадзены падчас урачыстай цырымоніі адкрыцця ў "БелЭкспа". Былі вызначаны і нумары, пад якімі выступяць юныя артысты ў фінале конкурсу на "Мінск-Арэне".
У цырымоніі адкрыцця прынялі ўдзел больш чым 300 чалавек. На чырвонай дарожцы канкурсантаў сустракалі вядучыя Дзяніс Дудзінскі і Ганна Квілорыя. А афіцыйны старт еўратыдню далі Старшыня Белтэлерадыёкампаніі і генеральны прадзюсар конкурсу Іван Эйсмант, а таксама супервайзер дзіцячага "Еўрабачання" Ён Ола Санд.
Беларускія фальклорныя матывы пераважалі ў графічным афармленні сцэны. З дапамогай 3D-праекцыі і камп'ютарнай графікі ўсе госці з 20 краін змаглі пазнаёміцца з культурнай спадчынай краіны - гаспадыні конкурсу.
А яшчэ стала вядома, хто будзе каменціраваць фінал шоу падчас прамой трансляцыі для беларускай аўдыторыі. Гэта тэлевядучыя Андрэй Макаёнак і Георгій Калдун.
Усе свежыя навіны конкурсу, інтэрв'ю з удзельнікамі, іх падрыхтоўка да фіналу ў эфіры кожны дзень у дзённіках "Еўрабачання" на "Беларусь 1" і "Беларусь 24", а таксама на афіцыйным YouTube-канале "Еўрабачанне" Беларусь".
Для ўсіх удзельнікаў дзіцячага "Еўрабачання" гэты тыдзень будзе вельмі насычаным. Напрыклад, сёння яны разам запішуць фінальны трэк, што прагучыць на "Мінск-Арэне" ў нядзелю. Ну і вядома, юных артыстаў чакае мноства рэпетыцый. Так што пажадаем ім цярпення і сіл.
