Нібыта дэжавю - сцэнічныя касцюмы сабраныя. Вакалісты расспеліся. У аўтобус, які суправаджае паліцэйскі эскорт. І на "Арэну". Сёння апошняя магчымасць змяніць варыянт здымак беларускага нумара на "Еўрабачанні". Пасля, калі пачнуцца генеральныя рэпетыцыі, нешта адкарэктаваць будзе ўжо немагчыма. Перад выхадам на сцэну - максімальная канцэнтрацыя.
Нумар ALEKSEEV здымаюць толькі 7 камер з 19, усталяваных на "Арэне", у асноўным - лятаючы стэдыкам. Іх пераключаюць у сярэднім кожныя 4-5 секунд. Разам усяго 27 планаў за 3 хвіліны песні. Звычайна іх больш, але такая рэжысёрская задумка.
Гэта добрая дынаміка, якая не дазволіць гледачу адарвацца ад таго, што адбываецца на сцэне. Ружа будзе парыць у бязважкасці. Праўда, рэжысёры забаранілі выкарыстоўваць жывыя кветкі. Справа ў тым, што ёсць рызыка страціць у палёце бутон. Але каманда аказалася гатовая - з сабою ёсць штучныя ружы.
Ола Мельцыг, тэхнічны дырэктар конкурсу песні "Еўрабачанне-2018": "У вас вельмі дынамічны пачуццёвы нумар. Мы прапанавалі шмат буйных планаў, каб сканцэнтраваць гледача на вачах ALEKSEEV і драме, якая будзе адбывацца на сцэне".
Пакуль увага рэжысёраў сканцэнтравана на вялікім маніторы, за вакалам сочыць трэнер. Алекс Панаі рыхтаваў шматлікіх прадстаўнікоў Беларусі на "Еўрабачанні". Каб ацаніць гучанне такім, як яго пачуюць гледачы, трэба слухаць песню не з дынамікаў па ўсёй арэне, а ў спецыяльных навушніках.
Разам з рэпетыцыямі змяняецца і напаўненне сцэны. Бо з прыходам 20 тысяч гледачоў на "Арэну" карцінка будзе іншай.
Вось такія муляжы рэжысёр выкарыстоўвае, каб зразумець, якой будзе вышыні натоўп фанатаў. Пакуль тут нікога. Журналісты назіраюць з прэс-цэнтра.
На прэс-канферэнцыі пасля другой рэпетыцыі сабралася каля сотні журналістаў з усёй Еўропы. Задавалі пытанні аб талісмане, аб любімых песнях "Еўрабачання", аб падтрымцы Кіраўніком беларускай дзяржавы і, вядома, аб фан-клубе.
Заўтра ALEKSEEV чакае яшчэ адна экскурсія ад арганізатараў "Еўрабачання" і падрыхтоўка да цырымоніі адкрыцця Еўратыдня і сіняй дарожкі.
