На "Беларусьфільме" сёння адбудзецца генеральны прагон нацадбору на "Еўрабачанне-2020"

Ужо зусім няшмат часу засталося да таго моманту, калі наша краіна вызначыцца са сваім кандыдатам на "Еўрабачанне-2020". У пятніцу ў 22 гадзіны на тэлеканалах "Беларусь 1" і "Беларусь 24" пачнецца трансляцыя фіналу нацыянальнага адбору на песенны конкурс. У прамым эфіры 12 прэтэндэнтаў пазмагаюцца за права праспяваць на сцэне міжнароднага музычнага форуму. 

Пакуль жа ўдзельнікі актыўна рыхтуюцца. Гала-канцэрт праекта будуць трансляваць з павільёна "Беларусьфільма". Там напярэдадні прайшлі індывідуальныя рэпетыцыі, а сёння ў графіку генеральны прагон шоу.

Пераможца нацадбору сёлета выберуць шляхам падсумоўвання ацэнак прафесійнага журы і гледачоў  50/50. Лідар галасавання атрымае спецыяльную ўзнагароду праекта - стылізаванае еўравізійнае сэрца  і адправіцца на "Еўрабачанне-2020" у Ратэрдам.