Памятныя мерапрыемствы сёння праходзяць па ўсёй краіне. Раніцай у сталіцы кветкі і вянкі да манумента на плошчы Перамогі ўсклалі ўдзельнікі Пятага Усебеларускага народнага сходу. Адкрываючы ж маштабны форум, Кіраўнік дзяржавы прапанаваў дэлегатам і гасцям ушанаваць памяць тых, хто абараніў свабоду і незалежнасць нашай Радзімы, хвілінай маўчання.
На працягу ўсяго дня нашы карэспандэнты ўключаліся з сімвалічных месцаў, куды сёння беларусы нясуць кветкі і аддаюць даніну памяці загінуўшым.
Зараз на сувязі са студыяй - ля Музея гісторыі Вялікай Айчыннай вайны - знаходзіцца здымачная група Агенцтва тэленавін. На сувязі Іна Пілевіч.
Пятае Усебеларускае народнае веча супала з вельмі важнай датай для нашай рэспублікі. У гэты дзень роўна 75 гадоў таму пачалася самая кровапралітная вайна 20 стагоддзя - Вялікая Айчынная. Барацьба за свабоду і незалежнасць адняла жыццё кожнага трэцяга беларуса. Супадзенне такой журботнай даты з Усебеларускім народным сходам толькі падкрэслівае, што, захоўваючы памяць, мы рухаемся наперад. Форум пачаўся з хвіліны маўчання ў гонар герояў, якія загінулі, змагаючыся за мірнае неба над галавой. Таму невыпадкова зараз я знаходжуся ля сімвала нашай Перамогі - Музея гісторыі Вялікай Айчыннай вайны.
У гэты дзень тут асабліва шмат наведвальнікаў. Новы будынак сховішча сведчанняў подзвігу народа сапраўды можна назваць дасягненнем апошняй пяцігодкі. Яшчэ на папярэднім Усебеларускім народным сходзе Кіраўнік дзяржавы падкрэсліў, што мастацтва павінна дапамагаць шанаваць нашу гісторыю, абуджаць у людзях патрыятычныя пачуцці, выхоўваць высокія нормы маралі. Па ініцыятыве Прэзідэнта ў 2014 годзе быў адчынены сучасны музейны комплекс як раз да 70-й гадавіны вызвалення Беларусі ад нямецка-фашысцкіх захопнікаў.
І зараз побач са мной знаходзіцца галоўны архітэктар Музея гісторыі Вялікай Айчыннай вайны Віктар Крамарэнка (прамое ўключэнне).
А мне застаецца дадаць, што Усебеларускі народны сход праходзіць у Год культуры ў Беларусі.
І нават у фінансава няпросты час дзяржава знаходзіць сродкі для будаўніцтва культурных аб'ектаў. За апошнюю пяцігодку, апроч Музея гісторыі Вялікай Айчыннай вайны, збудаваны мемарыяльны комплекс "Трасцянец", адрэстаўраваныя музей-запаведнік "Нясвіж", Тэатр юнага гледача, а таксама Купалаўскі і Моладзевы. І, зыходзячы з сённяшняга выступлення Прэзідэнта, цалкам відавочна, што Беларусь будзе прытрымлівацца ранейшага арыенціру - захоўваць і адраджаць гістарычна каштоўныя аб'екты. Плануецца павялічыць долю адрэстаўраваных помнікаў архітэктуры, уключаных у Дзяржаўны спіс гісторыка-культурных каштоўнасцяў Рэспублікі Беларусь, з 15 працэнтаў у 2015 годзе да 30 працэнтаў у 2020 годзе.
