Тры ў адным: тры персанальныя выставы ў адной экспазіцыі. У Цэнтры сучасных мастацтваў на Някрасава, 3 адкрыўся міжнародны праект "Гарызонты". Ён стартаваў летась на востраве Тэнэрыфе, а зараз пераехаў у беларускую сталіцу. Творчая справаздача аб'яднала мастакоў, якія нарадзіліся ў Беларусі, але зараз жывуць у розных краінах. Аляксей Кузняцоў - у Маскве, Дзяніс Сіняўскі - у Іспаніі, Сяргей Крыштаповіч - у Беларусі.
У кожнага свае мастацкія тэхнікі і лініі самавыражэння. Іх асабістыя праекты так і называюцца: "Лінія паветра", "Лінія зямлі", "Лінія вады". Напрыклад, Дзяніс Сіняўскі на палотнах разам са звыклымі фарбамі выкарыстоўвае марскую ваду, прыродную глебу і вулканічны пясок.
Для паўнаты ўспрымання даступныя фота і відэа прыроды, знятыя ў розных кутках свету. Праз жывапіс і інсталяцыі з гукавым афармленнем аўтары раскрылі тэму праекта "Гарызонты", які будзе экспанавацца да 1 сакавіка.