Летась здалося, што “Лістапад” па прычыне ці нестабільнага мясцовага надвор’я, ці, каб не паўтараць іншыя фестывалі, адмовіўся ад чырвонай дывановай дарожкі. Але верх прэстыжу і славы – праходжанне па Red carpet – на сёлетнім, 22-ім, міжнародным кінафестывалі адродзіцца - хай і ўмоўна, хай і алегарычна. Крыху часу, і ганаровыя госці трапяць у так званую фотазону кінатэатра “Масква”, а там – чырвоная дывановая дарожка і спецыяльны банер, на фоне якога зоркі змогуць увекавечыць сябе ў гісторыі “Лістапада”.
І самая сусветна пазнавальная асоба, першая, каго тут чакаюць, пастаянная наведвальніца чырвоных дарожак, уладальніца шматлікіх кінапрэмій, спецыяльная госця “Лістапада” - францужанка Фані Ардан. З учарашняга вечара яна ўжо ў Мінску. На цырымоніі прысутнічае і Вадзім Абдрашытаў - культавы рэжысёр сёлета ўзначаліць журы асноўнага конкурсу ігравога кіно. У ВІПах – і ўладальнік прэміі Еўрапейскай кінаакадэміі як лепшы акцёр, ісландзец Інгвар Сігюрдсан.
Сама цырымонія – з сімвалічным разбіваннем талеркі з аўтографамі ўдзельнікаў аб штатыў кінакамеры. І “маленькая Францыя ў Мінску” - кінапаказам афіцыйнага адкрыцця стане сусветная прэм’ера рэжысёра Гіёма Ніклу “Даліна кахання” – на экране Жэрар Дзепардзье і Ізабель Юпер. Стужка, якую яшчэ ў маі глядзелі фестывальныя Каны, сёння ў нас.
Зрэшты, на самым старце “Лістапада” – узнагарода. На сцэне адкрыцця кінафоруму будзе ўручаны Спецыяльны прыз Прэзідэнта “За захаванне і развіццё традыцый духоўнасці ў кінамастацтве”. Імя сёлетняга ўладальніка пакуль захоўваецца ў таямніцы.