Сёння свой юбілей адзначае майстар, які практычна заўсёды застаецца за кадрам і ў цітрах. 80 гадоў спаўняецца тэле- і кінарэжысёру, сцэнарысту, пісьменніку Уладзіміру Арлову. Яго працы на кінаарэне Савецкага Саюза выраблялі фурор. "Песняры", "А таксама цырк", "Пракляты ўтульны дом"… Зараз гэтыя стужкі ўжо залаты фонд. Каля 40 гадоў Уладзімір Арлоў прысвяціў тэлебачанню. У свае 80 рэжысёр не спыняе працу, працягвае здымаць фільмы, пісаць кнігі і нават прымерыў ролю тэлевядучага. З юбілярам пагутарыла Вольга Мядзведзь.
Гэтыя кадры эксклюзіў. Прэм'ера ад юбіляра Арлова. Новы фільм аб "Песнярах" і Уладзіміры Мулявіне, аб якіх ён, здаецца, ведае ўсё. Яны не былі сябрамі, але больш за Арлова легенд не здымаў ніхто. З 1971 па 2001 ВІА ў кадры гэтага рэжысёра. Фатаграфіі са здымачных пляцовак Арлоў захоўвае ў асобным фотаальбоме. Гэтыя здымкі і сямейны архіў Мулявіна раней не паказвалі публіцы - зараз гэта частка кінакарціны "Пясняр. Сэрцам і думамі". Яго пакажуць у 40-хвілінным варыянце і больш поўным гадзінным.
У кінематограф ён закахаўся ў раннім дзяцінстве, калі сям'я яшчэ жыла ў Баку. Тады ён назіраў за здымкамі фільма "Аршын мал алан". А ўжо ў Беларусі, 10-класніка Вову заўважылі на пляцоўцы кінастужкі "Міколка-паравоз" у Гродне. Пасля гэтага праекта яго параілі для новай карціны заснавальніка беларускага кіно Корш-Сабліна, які стаў першым настаўнікам Арлова.
Зараз у майстра сотні фільмаў. Сярод іх і шматсерыйны мастацкі "Пракляты ўтульны дом", "Запіскі Самсона Самасуя", дзясяткі дакументальных прац, шматлікія з якіх аб знакавых фігурах беларускай культуры, а таксама музычныя кінакарціны, тэлеспектаклі, канцэрты і ўжо больш за тузін аўтарскіх кніг.
Больш як 40 гадоў Уладзімір Арлоў прысвяціў тэлебачанню. За гэты час ён стварыў па-сапраўднаму залаты фонд. Але, нягледзячы на шаноўны ўзрост, паралельна з прэм'ерай фільма "Пясняр. Сэрцам і думамі" майстар працуе яшчэ над дзвюма дакументальнымі карцінамі.
