Беларускі пісьменнік Валерый Квілорыя прэзентуе працяг дзіцячай аповесці аб прыгодах школьнікаў "У трыдзявятым царстве". Мабыць, гэты самы папулярны твор аўтара ў юных чытачоў. Першая частка выйшла два гады таму. Другая - ужо гатовая да друку, але не хапае сродкаў. Таму пісьменнік прапануе калектыўнае супрацоўніцтва. Як дапамагчы дзіцячай кнізе быць не ў рукапісным экзэмпляры, ведае Аляксандра Драгун.
У бібліятэцы Лера Кузьміна частая госця. Сюжэты ўсіх хатніх кніг ужо ведае. Зараз вывучае літаратуру школьных і гарадскіх сховішчаў. Адзін з любімых пісьменнікаў дзяўчынкі - Валерый Квілорыя. Прызнаецца, асабліва па душы яго аповеды.
Сёння не толькі для Леры, для ўсіх яе аднакласнікаў сустрэча нечаканая і доўгачаканая. Дзеці пазнаёміліся з аўтарам, чые кнігі бяруць на абанемент у бібліятэцы.
Замест доўгіх лекцый - пацешныя гісторыі і дзіцячы смех. Гумар - галоўны інструмент пісьменніка. А таму падчас такіх творчых сустрэч юныя чытачы не адпускаюць Валерыя без аповедаў на біс.
У творчай скарбонцы - 20 кніг і апавяданняў для дзяцей. Мабыць, самая папулярная - аповесць "У трыдзявятым царстве". Першая частка выйшла два гады таму. Другая - 150 старонак - ужо гатовая да друку, зараз ідзе збор сродкаў. Пісьменнік прапануе калектыўнае супрацоўніцтва, якое практыкуюць у Еўропе.
Краўдфандынг, іншымі словамі - народнае фінансаванне. Людзі аб'ядноўваюць свае сілы і рэсурсы, каб падтрымаць пачынанні іншых. Як правіла, праз Інтэрнэт. Сёння ў Беларусі дзве такія платформы. Калі атрымаецца сабраць неабходную суму, аўтар праекта атрымае грошы, а яго памочнікі - падарункі.
За падтрымку па пошце вышлюць наваспечаную аповесць або нават цэлую калекцыю кніг Валерыя Квілорыя з запрашэннем на закрытае выступленне аўтара. А самы адданы мецэнат можа аказацца героем аднаго з апавяданняў у кнізе. Трэба толькі падтрымаць праект у Інтэрнэце.
