Сёння аб’явілі шорт-ліст Нацыянальнага конкурсу ў рамках " Лістапада". Так, у намінацыях гульнявога, дакументальнага і анімацыйнага кіно - два дзясяткі стужак! Не ўсе - беларускай вытворчасці. Напрыклад, аўтэнтычны фільм "1986-ць" - аб сучаснай Беларусі і жыцці пасля Чарнобыля зрэжысіраваў немец Лотар Херцаг. Убачым і фільм, зняты на касету, дакументальную гісторыю аб невідушчых футбалістах і кароткаметражку паводле кнігі "Возера радасці". Пераможцаў вызначыць журы. Яго састаў таксама аб’явілі на прэс-канферэнцыі. Гэта адборшчык фільмаў для Гётэборгскага кінафестывалю Фрэдзі Ольсан і польскі рэжысёр Кшыштаф Занусі (уладальнік "Залатога Льва" Венецыянскага фестывалю і лаўрэат міжнароднага кінафоруму ў Канах). Дарэчы, фільм-адкрыццё " Лістапада" пакуль трымаюць у таямніцы.
Таксама пакуль невядомыя імёны ганаровых гасцей форуму. На фестываль у Мінск прыедуць кінематаграфісты з Расіі, Украіны, Кітая, Чылі і Ірана. Большасць стужак у рамках конкурсных праграм прадставяць асабіста рэжысёры.
Усяго ў пазаконкурснай афішы " Лістапада" - 71 фільм. Білеты на любы можна набыць за дэмакратычную цану: ад 2,5 да 7 рублёў.