Культурная праграма на выхадныя ў рубрыцы "Праменад"

Лошыцкая сядзіба запрашае на экспазіцыю графікі і музычныя вечары ў суботу. А галерэя "Універсітэт культуры" дэманструе арт-аб'екты беларускіх і ўкраінскіх  майстроў. 

Культурная праграма на выхадныя ў Ларысы Гулякевіч.

У найбліжэйшыя суботнія вечары гасцёўня Лошыцкай сядзібы запрашае на музычную праграму "Асенняе лісце". Вядомыя творы кампазітараў мінулых эпох прагучаць у выкананні навучэнцаў і педагогаў каледжа імя Глінкі.

Інструментальная музыка рускіх і замежных кампазітараў, а таксама вакальныя сачыненні Сяргея Рахманінава, Пятра Чайкоўскага, Георгія Свірыдава  складаюць афішу музычнага цыкла, які будзе праходзіць у сядзібе Лошыцкага комплексу суботнімі вечарамі 23 і 30 лістапада, а таксама 7 снежня. З боку выканаўцаў Мінскага дзяржаўнага музычнага каледжа імя Глінкі  канцэртная праграма - гэта падарунак жыхарам Мінска да 95-годдзя сваёй альма-матэр.

У дапаўненне да культурнай праграмы выхаднога дня тут можна наведаць выставу графікі Дзмітрыя Шапавалава "Папяровае люстэрка".

Тэхнічныя працэсы стварэння гравюр і лінагравюр раскрываюць спецыяльныя формы - тыя матэрыялы, з якіх рабіўся адбітак,  а гэта дошкі, медныя і алюмініевыя пласціны, фрагменты лінолеуму. Рыцарская і ваенная тэматыка знайшла адлюстраванне ў серыі "Армія Вялікага княства Літоўскага". Тут аўтар не толькі аднаўляе дэталі касцюмаў і ваеннага абмундзіравання, але паказвае батальныя сцэны з подзвігамі нашых продкаў.

А ў Нацыянальным мастацкім музеі цікавая выстава рускіх імпрэсіяністаў.

"Ад рэалізму да імпрэсіянізму...". Амаль 60 жывапісных палотнаў вядомых майстроў рускага жывапісу другой паловы XIX - пачатку XX стагоддзя прадэманстраваны ў Мінску ўпершыню. Творы Ісаака Левітана, Івана Шышкіна, Аляксея Саўрасава, Ільі Рэпіна, Станіслава Жукоўскага і іншых рускіх мастакоў прыехалі ў Беларусь са збораў Дзяржаўнай Траццякоўскай галерэі ў Маскве. Паспейце наведаць выставу да 13 снежня.

Тэкстыль - як самы мабільны від мастацтва. Міжнародная выстава ўкраінскіх і беларускіх майстроў адкрылася ў мастацкай галерэі "Універсітэт культуры".

Манументальныя тэкстыльныя пано, габелены, інсталяцыі, тэкстыльныя аб’екты. Дзве школы - беларуская (віцебская) і ўкраінская з Роўна дзіўным чынам пераплятаюцца паміж сабой. Тэкстыльныя экспанаты яскрава сведчаць аб агульных каранях, захаванні традыцый пачатку мінулага стагоддзя. Аднак кожны бок дэманструе свой характар пошукаў і эксперыментаў разам з сучасным кампазіцыйным падыходам. Менавіта таму мастацкі праект носіць назву “Кругаварот”.

Белдзяржфілармонія ў суботу запрашае на чарговы цыкл канцэртаў для дзяцей і дарослых "Класіка - гэта класна" з заслужаным артыстам Расіі Яўгенам Бушковым. Прыемных і нясумных выхадных і да наступнай пятніцы.