Каманда Белтэлерадыёкампаніі пачынае здымкі візітовак для нацыянальнага адбору на дзіцячае "Еўрабачанне-2019"

Сёння каманда Белтэлерадыёкампаніі пачынае здымкі візітовак для нацыянальнага адбору на дзіцячае "Еўрабачанне-2019". Гэта кароткія ролікі пра кожнага фіналіста праекта. Яны будуць папярэднічаць нумару канкурсантаў падчас трансляцыі выніковага гала-канцэрта. Усяго здымачнай групе трэба будзе зрабіць 10 відэавізітовак - менавіта столькі ўдзельнікаў выступіць у фінале. Рэжысёрам выступіць Яна Шаблыка. У яе ўжо ёсць вопыт па стварэнні такога кантэнту - яна працавала над візітоўкамі дзіцячага "Еўрабачання-2018", якое мінулай восенню прымаў Мінск. 

Выніковы гала-канцэрт нацыянальнага адбору адбудзецца 20 верасня. Яго трансляцыю будуць весці тэлеканалы "Беларусь 1" і "Беларусь 24". Пераможцу праекта вызначаць па выніках галасавання гледачоў і журы. Лідар галасавання прадставіць нашу краіну на дзіцячым "Еўрабачанні-2019" 24 лістапада ў Глівіцэ (Польшча).