Сёння ў Белтэлерадыёкампаніі прайшоў кастынг вядучых дзіцячага "Еўрабачання-2018". На адбор у рэжыме прамога эфіру запрасілі 32-х кандыдатаў. За 5 хвілін прэтэндэнты шмат імправізавалі. Адгэтуль і галоўны крытэрый - свабоднае валоданне англійскай. Патэнцыйных кандыдатаў ацэньвалі не тэлегледачы, а запрошаныя эксперты. Спецыяльна для гэтага з Мальты прыляцеў шоу-дырэктар конкурсу Гордан Банела. Закуліссе кастынгу - у рэпартажы Ніны Мажэйкі.
Модныя ўлогі і нават сэлфі на мабільную камеру. На працягу месяца на адрас Макаёнка, 9 прыходзілі відэазаяўкі ад патэнцыйных вядучых конкурсу. Адрасанты з розных месцаў не тое, што краіны - свету. Еўропа і нават Злучаныя Штаты. Выхадцы з Беларусі і проста прыхільнікі шоу.
Стыкер з нумарам - абавязковы апазнавальны абярэг. Рэгістрацыя ля стойкі - і адразу чарга. Адміністратарам даводзіцца працаваць у чатыры рукі.
Дамова - першы дакумент на шляху да сцэны. Чорным па белым - простыя, але важныя фармальнасці. Запаўняюць старанна.
Вывучыць перад сном, пакласці тэкст пад падушку - дзедаўскія спосабы не працуюць. Тут важная сістэма. Пастаянная практыка мовы. Спецыяльна для кастынгу шматлікія займаліся з рэпетытарамі, хадзілі на курсы і нават з'язджалі з краіны, каб папрактыкавацца ў англійскай. Адной фразай прыкаваць да экранаў.
Спецыяльна для кастынгу выбралі студыю "600 метраў". І нездарма. Конкурс тэлевізійны, таму і адбор спецыфічны. Кожны ўдзельнік працаваў на камеру. Усяго адну. Пакуль. Уменне трымацца і трымаць публіку перад аб'ектывамі - вось што спрабавалі разгледзець эксперты. На аснове гэтага відэа, знятага ў фармаце высокай дакладнасці, і зробяць выбар.
На кастынг з Мальты прыляцеў шоу-дырэктар конкурсу Гордан Банела. Дасведчаны профі займаецца арганізацыяй дзіцячага "Еўрабачання" з 2014-га. Здзівіць складана. І ўсё ж магчыма. Калі табе 10. І ты вядучы-пачатковец.
Гордан Банела, шоу-дырэктар дзіцячага конкурсу песні "Еўрабачанне-2018": "Здольнасць імправізаваць. Гэта вельмі важна ў конкурсе. Ці можа чалавек сабрацца. Асабліва падчас працэдуры галасавання. Таму што ў гэты момант нельга нічога пераблытаць. Сёлета 20 краін - удзельніц конкурсу, некалькі журы, і кожнае паставіць свае балы. Гэта складана. А тым больш, калі ты ведаеш, што на цябе глядзяць мільёны людзей".
Аб выніках пакуль гаварыць рана. Журы трэба будзе адгледзець матэрыялы кастынгу. Кожны план. Магчыма, будуць камбінацыі - аднаго, двух, трох або нават чатырох вядучых. Хто скажа запаветныя "Добры вечар, Еўропа!" дзесяці мільёнам гледачоў, даведаемся зусім хутка.
