Да значнай гістарычнай даты - 70-годдзя Вялікай Перамогі - Белтэлерадыёкампанія рыхтуе маштабны кінапаказ. На працягу чатырох месяцаў адразу на некалькіх каналах тэлегледачы змогуць паглядзець як культавае савецкае кіно, так і работы сучасных рэжысёраў.
Расказвае Алена Борматава.
Першым у кінакантэнце на першай кнопцы - культавы савецкі серыял “Сямнаццаць імгненняў вясны”. Фільм Ліёзнавай пачне толькі адну лінейку патрыятычнага ваеннага кіно на “Беларусь 1”. Штовечар, адразу пасля інфармацыйнага канала “Панарама”, у адмысловай рубрыцы “Да 70-годдзя Вялікай Перамогі” - гісторыя Вялікай Айчыннай у інтэрпрэтацыі легендаў кінематографа.
Кіно пра вайну на “Беларусь 1” будуць паказваць не толькі ў вячэрні прайм-тайм. Час паміж выніковым інфармацыйным вяшчаннем таксама аддадзены для ваеннага кіно. Працы сучаснай кінаіндустрыі пра падзеі саракавых склалі яшчэ адну лінейку паказу. Яна стартуе ў панядзелак, 16 сакавіка, з прэм’еры канала - серыяла “Гетэры майора Сакалова”.
Найбуйнейшы медыяхолдынг краіны - Белтэлерадыёкампанія -дамінантай кінавяшчання на некалькі найбліжэйшых месяцаў робіць хіты батальнага кіно. Стужкі, на якіх вырасла некалькі пакаленняў.
Алена Радзевіч, дырэктар дырэкцыі ліцэнзійных праграм і кінапаказу Белтэлерадыёкампаніі: "Гледачы змогуць убачыць не толькі сучаснае ваеннае кіно, але таксама і культавыя савецкія серыялы і фільмы, якія пройдуць насамрэч у розны час - і ў вячэрняе, і ў дзённае і па выхадных днях асабліва па меры набліжэння да даты - 9 мая".
Сотні гадзін вяшчання адразу на некалькіх каналах холдынга - наша памяць пра ўсе 1418 дзён і начэй Вялікай Айчыннай - у кінавобразах і дакументальных гісторыях. Гісторыя вайны, у якой Беларусь страціла кожнага трэцяга, будзе асновай і інтэрнэт-вяшчання Белтэлерадыёкампаніі.
Святлана Смалонская-Краскоўская, кіраўнік прэс-службы Белтэлерадыёкампаніі: "Мы не абмяжоўваемся толькі кінапаказам. Вялікую працу падрыхтоўчую праводзяць дырэкцыі, якія здымаюць уласныя праекты. Першымі ў гульню ўступае Агенцтва тэлевізійных навін. Зараз вядзецца праца па здымках цыкла дакументальных фільмаў".
Стужкі пра вайну не завершацца з гістарычнай датай – 9 мая. Дзень 70-годдзя Перамогі - заключная частка кінаэпапеі “Вызваленне”. Кінагісторыі Вялікай Айчыннай на каналах будуць дэманстраваць да ліпеня. На радыёканалах холдынга акрамя спецыяльных дакументальна-публіцыстычных праектаў, яшчэ і радыёспектаклі.
