За чвэрць стагоддзя ён стаў візітнай карткай Віцебска, а яго наведванне ўваходзіць ва ўсе турыстычныя маршруты па горадзе. Сёння спаўняецца 25 гадоў з дня стварэння Музея Марка Шагала ў Віцебску. На той момант на малой радзіме майстра нічога, акрамя копій, не было. Сёння тут сабрана самая вялікая ў Беларусі калекцыя графічных работ мастака. Акрамя таго, музей з'яўляецца вялікім навуковым цэнтрам. З усяго свету сюды прыязджаюць даследчыкі творчасці Шагала і мастацкага авангарда 20 стагоддзя. Вольга Маслоўская ўбачыла шэдэўры.
Музей Марка Шагала ў Віцебску самы малады з тых, дзе можна ўбачыць работы мастака. Ён быў створаны чвэрць стагоддзя таму. Цяжка ўявіць, але тады ў Беларусі пра Шагала не ведалі амаль нічога. Творчасць мастака-эмігранта была пад тайнай забаронай.
Нічога, акрамя копій, на малой радзіме Шагала не было. Арыгінальным быў толькі дом сям'і Шагалаў на Пакроўскай.
Адрэстаўраваць будынак і стварыць тут экспазіцыю дапамаглі жыхары нямецкага горада Нінбурга - пабраціма Віцебска. Яны нават аб'ядналіся ў "Круг садзейнічання віцебскаму музею". А мэр Нінбурга падарыў літаграфію Шагала, якая стала першым арыгіналам у віцебскім зборы.
Сёння ў калекцыі - больш за 300 графічных работ Шагала. І гэта траціна ўсёй спадчыны майстра ў галіне друкаванай графікі. Але не толькі таму ў Віцебск прыязджаюць даследчыкі творчасці Шагала з усяго свету. Тут знаходзіцца адна з самых багатых бібліятэк, прысвечаных даследаванню яго творчасці. Гэты збор кніг - гонар і найвялікшая каштоўнасць Музея Шагала ў Віцебску.
На выставе, прысвечанай 25-годдзю музея Марка Шагала ў Віцебску, усе вехі яго станаўлення. Урачыстасць атрымалася амаль сямейнай, але тэатральна яркай, як і творчасць майстра. А ў наступным годзе яшчэ адна знакавая дата. Свет адзначыць 130 гадоў з дня нараджэння Марка Шагала.
