Практычна касмічны поспех прадказваюць "Беларусьфільму" пасля рэканструкцыі. Былую (яшчэ савецкую) славу абяцалі вярнуць з тэхнічным аснашчэннем па апошнім слове, шматтысячнымі складамі касцюмаў, рэквізіту (нават артылерыі) і, вядома, найноўшымі магчымасцямі прадакшну, постпрадакшну і павялічанай павільённай плошчай. Зараз гэта 4,5 тысячы квадратных метраў.
Паглядзець на беларускі кінаканвеер прыязджалі знакамітыя рэжысёры. Але вось ужо паўтара года пра наша кіно практычна не чуваць. Што здымаем, а самае галоўнае - дзе і для каго паказваем, бо ў афішах кінатэатраў адны замежныя фільмы. На тыдні наш кінавытворца прэзентаваў рабочыя матэрыялы адразу некалькіх стужак: першага моладзевага сіткома "Ілюзіі", гістарычнага фэнтэзі "Авантуры Пранціша Вырвіча" і ваеннай кінастужкі "Лёс дыверсанта".
Але гэта пакуль напрацоўкі і праекты на пачатковай стадыі вытворчасці, а да 95-годдзя беларускага кіно, якое адзначаць будзем у снежні, хацелася б прэм'ерных карцін. Прадоўжым гутарку ў студыі "Галоўнага эфіру". Да нас далучыўся дырэктар нацыянальнай кінастудыі "Беларусьфільм" Уладзімір Карачэўскі (відэа).
