На першым пленэры стаяла звышзадача - стварыць вобразы ў рамках канона, але з выкарыстаннем сучасных тэхнік дэкаравання і новых матэрыялаў.
Аб працах, якія ўвойдуць у калекцыі першага ў краіне музея беларускай іконы, - Дар'я Тарасава. Напісаць абраз за рэкордна кароткі тэрмін, патраціўшы на стварэнне вобраза менш як два тыдні. Удзельнікі першага беларускага іканапіснага пленэра не проста справіліся з пастаўленай задачай, але і перавыканалі план. Тут, у маляўнічым Лагойску, кожным майстрам напісана адразу некалькі святых вобразаў.
Аб'яднаўчым звяном сустрэчы стала ікона Жыровіцкай Божай Маці, перададзеная ў якасці пераходзячага талісмана з Польскага пленэра ў Навіцы. У сваіх працах іканапісцы звярнуліся да цудатворных выяў Вострабрамскай, Юравіцкай, Мар'інагорскай і Лагойскай Божай Маці. Дарэчы, ад арыгінала апошняй захавалася толькі частка, таму майстры павінны былі не проста скапіраваць абраз, а вывучыць усё, што звязана з яе цудатварэннем. Нягледзячы на тое, што гэта сустрэча - пленэр, а менавіта так называюць выязныя таварыствы мастакоў-іканапісцаў, жывапісцы працуюць у майстэрні.
З сабой у Беларусь кожны майстар прывёз і свае прафесійныя сакрэты. Напрыклад, мастакі з Польшчы падзяліліся тонкасцямі візантыйскага ліста, кіяўлянка - вырабам разьбянога ляўкаса і майстар-класам па тэхніцы залачэння абраза, а вось беларус Мікалай Доўнар расказаў аб чаканцы па ляўкасе.
Працы на тэму Беларускай цудатворнай іконы першай убачыла капліца, менавіта там змантавалі справаздачную выставу аб пленары і падвялі вынікі двухтыднёвага творчага марафона. Сёння ж працы прыбылі ў Мінск, у Мастацкую галерэю ўніверсітэта культуры. Акрамя Беларусі, іконы плануюць паказаць у Варшаве, Польшчы і Кіеве.
