Літаральна пару дзён застаецца да галоўнага выхаду на вялікую сцэну нашай удзельніцы. Сёння Хелена Мерааі дала першую ў сваім жыцці прэс-канферэнцыю. Таксама беларускай камандзе была дадзена фінальная магчымасць ўнесці змяненні па святле, гуку і раскадроўцы на другой рэпетыцыі. Кожны крок нашай дэлегацыі пад прыцэлам здымачнай групы Агенцтва тэленавін. Якім жа будзе беларускі нумар? Эксклюзіўныя кадры з Тбілісі ў рэпартажы Іны Пілевіч.
Каб як у песні "нібы камета ззяць у космасе дзесьці", яе ўзносяць на п'едэстал. Хелена Мерааі выканае свой конкурсны хіт "Я самая" з подыума. Дэкарацыя была распрацавана дызайнерамі і інжынерамі спецыяльна для выступлення на дзіцячым "Еўрабачанні". Чорная таблетка аддэкаравана люстэркамі. Яны могуць круціцца ў любым кірунку і адлюстроўваць светлавыя промні. Тым самым ствараецца своеасаблівы арэол вакол выканаўцы.
Умовы прамой трансляцыі дыктуе строгі часавы рэгламент. У артыста ёсць усяго 30 секунд, каб выйсці на сцэну. Пакуль у эфіры ідзе відэавізітоўка ўдзельніка, работнікам пляцоўкі трэба паспець усталяваць для Хелены подыум, мікрафонную стойку.
Адчуванне містыкі і загадкавасці можа перадацца гледачу толькі пры пэўнай пастаноўцы сцэнічнага святла. Беларускай дэлегацыі давялося пераканаць здымачную групу Еўрапейскага Вяшчальнага Саюза практычна цалкам змяніць раскадроўку нумара. Сёння ў нашай каманды другая рэпетыцыя і апошняя магчымасць адкарэктаваць падачу выступлення на экране.
Юн Ула Сан, супервайзер дзіцячага "Еўрабачання" і "Еўрабачання": "Беларуская каманда заўсёды выдатна падрыхтаваная як на дарослым "Еўрабачанні", так і на дзіцячым. Гэтая падтрымка важная для вашага артыста, каб ён мог прадставіць краіну годна".
Брытанскія журналісты назвалі нумар Хелены адным з самых яркіх у шоу. Сёння наша канкурсантка дала першую ў сваёй біяграфіі прэс-канферэнцыю. Пад прыцэлам тэле і фотакамер выканаўца адказвала на пытанні журналістаў з усёй Еўропы і прадэманстравала свае вакальныя здольнасці.
Падтрымаць Хелену Мерааі і ўсю беларускую дэлегацыю на пляцоўку прыйшоў пасол Беларусі ў Грузіі Міхаіл Мятлікаў. Таксама неўзабаве з Мінска ў Тбілісі прыляціць група балельшчыкаў. Заўтра ў графіку Хелены - рэпетыцыя адкрыцця і агульнай песні тэлешоу. Дзень абяцае быць хвалюючым. Праз суткі свае балы нашай прадстаўніцы пачнуць выстаўляць гледачы. Галасаванне будзе адкрыта ў Інтэрнэце на сайце www.junioreurovision.tv. Упершыню ў гісторыі праекта ў беларусаў ёсць шанц прагаласаваць за свайго дэлегата.
