Літаральна паўгадзіны таму з прэм'еры фільма вярнуўся мой калега Юрый Шаўчук.
Гэтую прэм'еру чакалі больш як 25 гадоў. Яшчэ ў 80-я вядомы тэлесерыял Дзяржаўная граніца з 8 фільмаў палюбіўся ўсім кінаманам Савецкага Саюза. І вось сёння ў Доме кіно прэм'ера легендарнага серыяла.
У свой час тэлесерыял пра службу савецкіх пагранічнікаў збіраў ля экранаў мільёны гледачоў па ўсім СССР. Дзеянні карціны разгарнуліся ад Далёкага Усходу да заходніх межаў дзяржавы. Перыяд з 1917 па 1980-я гады. Новы фільм Кур'еры страху падхапляе і працягвае храналогію падзей.
Паводле сюжэта 9-га фільма, ветэран баявых дзеянняў у Афганістане вяртаецца ў родную Беларусь. У краіне, якая толькі здабыла незалежнасць, ствараецца новая нацыянальная служба па ахове граніцы. Маёр уступае ў яе рады, дзе героя чакаюць не проста складаныя, а па-сапраўднаму небяспечныя працоўныя будні.
Валянцін Залужны, аўтар сцэнарыя фільма: Развал вялікай краіны - Савецкага Саюза, утварэнне новай маладой рэспублікі, тых межаў, якіх раней не існавала з Літвой, Украінай, нам даводзілася ствараць зноў. Вось пра гэтых людзей і распавядае фільм.
Сёння ацаніць прэм'еру прыйшлі і ідэйныя натхніцелі працягу фільма. Ізноў Дзяржаўная граніца пад прыцэлы кінакамер трапіла шмат у чым дзякуючы Беларусьфільму і Дзяржпагранкамітэту. Нацыянальная кінастудыя займалася ўвасабленнем праекта, пагранічнікі дапамагалі матэрыяльна. Мільён долараў - менавіта такім апынуўся бюджэт карціны.
Леанід Мальцаў, Старшыня ДПК Беларусі: Сама спроба прадоўжыць тэлесерыял, сама спроба паказаць станаўленне нашай дзяржаўнасці. Не можа быць дзяржавы без нармальнай дзяржграніцы. Гэта вельмі важна, таму мы вітаем стварэнне такіх фільмаў.
Здымкі фільма праходзілі на рэальнай беларуска-літоўскай граніцы. Таксама ў кадр трапілі Мінск, Ліда, Смаргонь. Перастрэлкі, бойкі, пагоні - усё знята ў лепшых традыцыях прыгодніцкай стужкі.
У будучыні кінастудыя ў тандэме з пагранічнікамі зніме яшчэ 8 новых прыгодніцкіх эпізодаў. Паўтара тыдня таму ўжо пачаліся здымкі наступнага фільма Легенды АСАМа. Яго прэм'ера прызначаная на канец года. Цалкам завяршыць працу над праектам стваральнікі серыяла плануюць у 2016 годзе.