Ужо ўпадабаны мінчанамі фестываль вулічнага мастацтва "Вуліца Бразіл" праходзіць трэці сезон запар. Гэтым разам бразільскае графіці ў літаральным сэнсе ажыўляе індустрыяльныя мясцовыя будынкі. Трохметровыя алень і зубр, анімацыйныя персанажы, фальклорныя героі - пяць мастакоў з Бразіліі і Беларусі ствараюць урбан-арт-прастору. Дарэчы, адна з бразільскіх кампазіцый можа патрапіць у Кнігу рэкордаў Гінеса. А ў беларускім насценным пано заквітнее клематыс. І гэта яшчэ не ўсе навіны праекта. Пра трэці урбан-арт-фестываль рэпартаж Юліі Токар.
Ужо ўпадабаныя мінчанамі сівавалосы гусляр і птушка шчасця на вуліцы Кастрычніцкай, на цаглянай сцяне станкабудаўнічага завода, зараз будуць суседнічаць з новымі фальклорнымі героямі. Мастак Яўген Мацюта - сталы ўдзельнік стрыт-арт-фестывалю "Вуліца Бразіл" - старанна вымалёўвае рысы твараў мужчыны і жанчыны. Невыпадкова сваю кіламетровую кампазіцыю ён завершыць сюжэтам аб сямейных каштоўнасцях.
15 літраў акрылу, 30 аэразольных балончыкаў і жывыя ампельныя расліны. Менавіта ліяны вінаградніку, клематыса і актынідыі нададуць 3Д-эфект вулічнаму стрыт-арту Яўгена Мацюты.
Юлія Стратовіч, кіраўнік студыі вертыкальнага азелянення, фларыст: "Гэта была сумесная ідэя з Яўгенам Ковекам. Першапачаткова мы планавалі зрабіць сцяну з жывымі раслінамі. Мы пачалі гуляць з гэтай ідэяй і спыніліся на азеляненні даху.
На яго малюнку намаляваныя кроны дрэў, якія будуць азелянёныя. Якім чынам? На даху мы ставім паддоны. Праводзім аўтапаліванне, і зеляніна запаўняе кроны намаляваныя".
Трэці сезон урбан-арт-фестывалю "Вуліца Бразіл" гэтым разам сканцэнтраваў мастакоў на адной вуліцы. Пяць аўтараў з Паўднёвай Амерыкі разам з беларускімі графіцістамі ў літаральным сэнсе ажыўляюць індустрыяльную вуліцу Кастрычніцкую, ствараючы новыя арт-аб’екты, графічныя палотны і муралы. Адзін з манументальных малюнкаў Рамона Мартынса прэтэндуе на Кнігу рэкордаў Гінеса. Плошча кампазіцыі дасягне трох з паловай квадратных кіламетраў.
Рамон Мартынс, мастак, удзельнік праекта VULICA BRASIL (БРАЗІЛІЯ): "Перш чым прыехаць у Беларусь, я пачаў даследаваць, якія ў вас ёсць жывёліны. Я вельмі люблю прыроду. І мне захацелася захаваць сімвалы вашай краіны - зубра, аленя, іх не сустрэць у горадзе. І таму я вырашыў у сваёй працы нагадаць, што чалавек - частка прыроды. А што датычыцца рэкорду, для мяне важна, каб гэты мурал патрапіў у мой асабісты спіс як лепшая кампазіцыя".
Зялёныя сцены, сучасныя велапаркоўкі, шпакоўні і арт-крамы. Пад эксперыментальнае мастацтва патрапіць і рарытэтны трамвай, які курсаваў калісьці ад вуліцы Бабруйскай да Кастрычніцкай.
Яшчэ адна навіна фестывалю - галерэя на колах. На гэтым арт-грузавіку ўдзельнікі праекта ствараюць маляўнічыя карціны. Палотны рэгулярна змяняюцца. Такім чынам, патрапіць на кузаў аўтамабіля можа кожны аўтар. У канцы года ўсе творчыя работы пакажуць на адной выставе.
Напрыканцы фестывалю адбудзецца вялікі опен-эйр. З жывымі канцэртамі і танцавальным марафонам. У сапраўдны бразільскі карнавал Кастрычніцкая акунецца 17 верасня.
