Яна стала першай у гісторыі нашай краіны на конкурсе. Алёна Ланская прэзентавала сваю песню і нашу краіну. І калі для дэлегацыі асноўная частка работы выкананая, то зараз у бой ідуць нашы артысты. Напярэдадні прайшлі апошнія персанальныя рэпетыцыі, а разам з імі завяршыліся кансультацыі з рэжысёрамі. Зараз - толькі генеральныя прагоны.
За ўсімі навінамі ў Мальмё сочыць наш спецыяльны карэспандэнт Яўген Перлін. Падзеяй тыдня стала доўгачаканая прэзентацыя сукенкі Алёны Ланской. Паколькі другая рэпетыцыя праходзіла ў касцюмах, артысты былі ў канцэртным макіяжы і ўборах. Сукенку Алёны ўпрыгожваюць 70 тысяч камянёў Swarovski. У апошнюю ноч грэчаскі дызайнер Канстанцінас Куцаміхас уносіў апошнія змяненні, каб яна ідэальна сядзела на Алёне. Так і атрымалася…
Канстанцінас Куцаміхас, стыліст-дызайнер Алёны Ланской на конкурсе песні Еўрабачанне-2013: Сукенка шыкоўна глядзіцца... Яна апраўдала нашы чаканні. Дзякуючы гэтай сукенцы выступленне нашай Алёны стане бліскучым.
Харэограф Алекса Райфавіч таксама застаўся задаволены рэпетыцыяй. Аператары і рэжысёры зразумелі задумку беларускай каманды і гатовыя яе ўвасобіць. Усяго будуць працаваць 24 камеры. 20 з іх у зале і 4 - у green room. Што цікаўна: падчас некаторых нумароў на сцэне будуць знаходзіцца больш чым шэсць чалавек. Два аператары будуць прабягаць вакол артыстаў, як бы аблятаючы іх. Таксама дынамікі дададуць два краны і тры цялежкі, якія тут ласкава называюць Долі. На конкурсе Еўрабачанне яны перамяшчаюцца аўтаматычна. А вось кіраваць імі будзе тэхнічны рэжысёр. Менавіта ён дае каманды аператарам праз гарнітуру. Так што гледачы не засумуюць.
Паколькі мне трэба будзе каменціраваць шоу, мы змаглі трапіць у каментатарскія кабінкі. У мяне ў адрозненне ад большасці тэлегледачоў будуць два маніторы. На адным пакажуць агульную трансляцыю, а на другім - як артысты будуць рыхтавацца да выхаду.
Ужо пасля рэпетыцый Алёна Ланская дала вялікую прэс-канферэнцыю. Дваццаці хвілін журналістам не хапіла. Алёне ўдалося настолькі зачараваць журналістаў, што беларускую вечарынку ў Мальмё чакалі ледзь не больш, чым адкрыцця еўраклуба. І сабраліся амаль усе ўдзельнікі першага паўфіналу.
Вечарынка ў разгары. Прыйшлі ўдзельнікі ад Расіі, Ірландыі, Аўстрыі, Азербайджана, Македоніі. Еўропа дачакалася выбуху эмоцый. Пазней з'явіліся ірландцы, чарнагорцы, азербайджанцы, харваты/ Вядучым вечара стаў мой калега Юрый Ярошык. Госці па чарзе выступілі са сваімі конкурснымі песнямі, якім зала ўжо падпявала. І усе жадалі перамогі Алёне. Прыйшло і шмат шведскіх знакамітасцяў. Папулярная тэлевядучая і экс-салістка гурта A-Teens Мары Сернехольт пажадала Беларусі поспеху на Еўрабачанні.
Пасля зорнага разагрэву бэк-вакалісты Алёны Ланской упершыню прадэманстравалі акустычную версію песні Салеа, якую зала сустрэла апладысментамі. А адразу за гэтым мікрафон узяла і Алёна. Толькі жывы гук. Разам з залай. Танцаваў увесь еўраклуб. Не абышлося сёння і без сюрпрызаў. З надыходам ночы дзень нараджэння адзначыла бэк-вакалістка Алёны Марыя Лазіч. Такога віншавання яна не чакала.
Сёння каля паўночы адкрываецца еўратыдзень. Вечар з дрэс-кодам блэк-тай пройдзе ў оперным тэатры горада Мальмё. І з гэтага моманту конкурс песні можна будзе лічыць адкрытым. У панядзелак пачынаюцца першыя генеральныя рэпетыцыі нашага паўфіналу.
