Яшчэ адзін юбілей гэтага года. Тэлевядучая Алена Спірыдовіч сёння адзначае свой дзень нараджэння. Твар і голас міжнароднага фэсту "Славянскі базар", улюбёнка мільёнаў гледачоў, больш як 20 гадоў з'яўляецца на сцэне з пазыўнымі фэсту. Яркая і запамінальная Спірыдовіч стала сімвалам беларускага тэлебачання.
З імянінніцай сустрэлася і Ніна Мажэйка.
У дзень свайго юбілею Алена Спірыдовіч... на працы. Апошнія ўзмахі пэндзліка і порцыя лаку для валасоў перад прамым эфірам.
Вядучая максімальна засяроджаная, хоць у грымёрнай сабраліся калегі. Для таго каб "зафіксаваць" у розуме сцэнарый, спатрэбілася не больш як 30 хвілін. Вопыт.
У студыю "600 метраў" павольным крокам, каб не збіць дыханне. Настройка вушных манітораў, праверка гуку, тэлефонных апаратаў. Сёння ў раскладзе Спірыдовіч прамы эфір аднаго з самых рэйтынгавых праектаў на першай кнопцы. "Белорусское времечко" або "тэлевізійны ЖЭС".
У 90-ых экстравагантная выпускніца журфака вяла музычныя праграмы. Яркая і запамінальная. Ідэальная кандыдатура на ролю вядучай "Славянскага базару". Але на сцэне Летняга амфітэатра Спірыдовіч з'явілася толькі на наступны год пасля адкрыцця міжнароднага форуму. Яе "іншапланетную" стрыжку ўбачылі мільёны.
Тэлегледачы, вядома ж, памятаюць знакамітыя фанфары "Славянскага базару". З іх стартуе кожны канцэрт на сцэне Летняга амфітэатра, дарэчы, таксама вельмі вядомага сімвала музычнага форуму. Але па-сапраўднаму "сваім" "Славянскі базар" стаў шмат у чым дзякуючы прафесійным вядучым. Алена Спірыдовіч - твар і голас фэсту. Менавіта з ёй асацыюецца адзін з найбуйнейшых міжнародных форумаў.
Славянскае трыа - Беларусь, Расія і Украіна - штогод адкрывае і закрывае фэст у Віцебску. Узорнай партнёркай Спірыдовіч назваў расійскі калега і сябар Уладзімір Бярэзін.
У свой юбілей Алена Спірыдовіч стала гераіняй юбілейнага выпуску праграмы "Буйным планам" з Маратам Маркавым.
Ці праўда, што тэлевізійны лёс Спірыдовіч прадказалі яшчэ да нараджэння? Як першае з'яўленне на віцебскім фэсце ледзь не стала апошнім? І аб чым маўчаць газеты? Хутка аб гэтым і не толькі ў праграме "Буйным планам".
