Два дні на сцэне Вялікага тэатра Беларусі Піцерскі балет пад кіраўніцтвам мэтра псіхалагічнага балета харэографа Барыса Эйфмана. У сваіх спектаклях ён звяртаецца да творчасці Пушкіна, Заля, Чэхава, Шэкспіра. А ў Мінск прыехаў з прэм'ерай паводле Дастаеўскага Браты Карамазавы.
Падрабязней - Ларыса Гулякевіч.
Зварот да такіх літаратурных вобразаў, як Анегін, Ганна Карэніна, Дон Жуан, Чайка, Радэн і тым больш Браты Карамазавы Дастаеўскага не заўсёды пад сілу сусветнаму кінематографу. А тут - балет, дзе раскрываюцца вечныя пытанні духоўнага і філасофскага жыцця чалавецтва.
Класіка сусветнай літаратуры ў харэаграфіі Барыса Эйфмана. Ён спалучае ў сваіх спектаклях музычныя творы Чайкоўскага, Баха, Шнітке і нават рок-музыку. А такі выразны сродак у мастацтве як мова цела тут вельмі красамоўны і даведзены да дасканаласці. У аўтарскіх спектаклях Барыса Эйфмана драматычная ігра артыстаў не саступае сучаснай харэаграфіі. Тут прысутнічае ўсё: мастацтва танца, пастаноўка святла, выдатная музыка і феерычнае балетнае шоу са спецэфектамі. Балет Браты Карамазавы - новае пластычнае прачытанне Эйфманам рамана Дастаеўскага. Кардынальна перапрацаваўшы свой уласны спектакль 1995 года Карамазавы, які ў свой час набыў сусветнае прызнанне, харэограф стварыў эмацыянальна і інтэлектуальна насычаную балетную псіхадраму ў танцы.
Трэба адзначыць, што асноўную частку трупы Эйфманаўскага балета складаюць беларусы. Заваяваць увагу і любоў піцерскай публікі не лёгка, сусветнай - тым больш. Беларускага гледача лічаць у тэатры Эйфмана падрыхтаваным, інтэлектуальным і ўдзячным.
