Ён паспявае працаваць з шасцю вядучымі аркестрамі свету, а новую прэм'еру запрошаны ставіць у Маскоўскі тэатр імя Станіслаўскага і Неміровіча-Данчанкі. Дырыжору Вячаславу Волічу на днях споўнілася 50. Маэстра цесна звязаны і з Вялікім тэатрам оперы і балета Беларусі. За пастаноўку оперы Набука ён удастоены першай Нацыянальнай тэатральнай прэміі. У родным тэатры дырыжор адзначыў і свой юбілей.
Расказвае Наталля Бардзілоўская.
Нацыянальны балет Вітаўт. Яго нашумелая прэм'ера - быццам спецыяльна да юбілею Воліча. Гэта маэстра з аркестрам Вялікага агучыў партытуру Вячаслава Кузняцова. Дырыжор - перакананы папулярызатар беларускага музычнага мастацтва. Ён аўтар такіх праектаў, як Ноч у Мірскім замку, Маладыя таленты Беларусі, Вечары ў замку Радзівілаў. За асабісты ўклад у адраджэнне старажытнай беларускай музыкі Воліч удастоены Спецыяльнай прэміі Прэзідэнта. Уладальнік медаля Францыска Скарыны. Зрэшты, яго дырыжорскі жэст нарасхват і за мяжой.
Услед за музычнымі тэатрамі Турцыі, Азербайджана і Татарстана Воліча ангажыравала Масква. Пастаноўка оперы Вайна і мір стала пачаткам супрацоўніцтва паміж ім і Тэатрам імя Станіслаўскага і Неміровіча-Данчанкі. Сёння музыка жыве і працуе на два горады, але юбілей адзначае, вядома ж, на Радзіме.
Юбілейны вечар Воліч адзначыў за дырыжорскім пультам і з любімай партытурай - операй Князь Ігар. У Вялікім тэатры дырыжор ужо два дзясяткі гадоў. Яго рэпертуар - больш як трыццаць опер і балетаў. У многіх прэм'ерах Вячаслаў Іванавіч выступіў пастаноўшчыкам.
Дырыжорская школа Вячаслава Воліча - ад народных артыстаў Аляксандра Анісімава і Генадзя Праватарава. Пачынаў маэстра ў аркестры Няміга і музкамедыі. Пасля юбілейнага вечара ў Беларусі Воліча чакаюць у Маскве. Разам з Феліксам Корабавым і Петэрам Штайнам дырыжор ставіць вердзіеўскую Аіду.
