І пачнем выпуск эксклюзівам Агенцтва тэленавін. Журы нацыянальнага адбору на дзіцячае "Еўрабачанне" вызначыла фіналістаў праекта.
Па выніках праслухоўвання фіналістамі адборачнага тура сталі:
Арцём Скароль (г.Ашмяны, Гродзенская вобласць), "Усміхніся";
Лізавета Мея (г. Жодзіна, Мінская вобласць), "Зорка";
Марыя Гулевіч (г. Мінск), "Востраў Чыкарум";
Даніэль Алекс Ястрэмскі (г. Мінск), Time;
Ангеліна Ярашчук (г. Мінск), Feeling Good;
група "Мята" (г. Мінск), "Аднойчы";
Мікіта Бялько (г. Мінск), "Не здрадзь";
Марыя Жыліна (г. Мінск), Welcome To My Belarus;
Яраслаў Саколікаў (г. Мінск), "Свет на зямлі";
вакальная група Мonkey Tops (г. Мінск), "На стылі".
Дзясятку лепшых вызначылі па выніках праслухоўвання. Яно адбылося сёння ў сценах Белтэлерадыёкампаніі. Кампетэнтнае журы, у складзе якога музыканты, артысты, прадзюсары, ацанілі 62 кампазіцыі. Менавіта столькі заявак паступіла на адрас галоўнага медыяхолдынга краіны. Сярод прэтэндэнтаў як сольныя выканаўцы, так і калектывы ад 9 да 14 гадоў.
Ужо заўтра вызначыцца парадак выхаду фіналістаў на сцэну гала-канцэрта. Апоўдні ў Белтэлерадыёкампаніі пройдзе жараб'ёўка. Само ж фінальнае шоу адбудзецца не пазней за 15 верасня. Трыумфатар конкурсу прадставіць Беларусь на дзіцячым "Еўрабачанні-2018", якое ў лістападзе прымае Мінск.
Падрабязнасці праслухоўвання глядзіце гэтым вечарам у праграме "Панарама".