Вялікі тэатр апускае заслону да 15 верасня. Якіх навінак чакаць у 87-м тэатральным сезоне?

Вялікі тэатр апускае заслону. Прычым сёлета ўпершыню дзверы тэатра былі адчыненыя да ліпеня і паралельна ішла падрыхтоўка да новага сезона. Якіх навінак чакаць у афішы галоўнай акадэмічнай сцэны краіны - ведае Дар'я Тарасава. 

У новым сезоне на пуанты стане і "Ганна Карэніна". Балетную інтэрпрэтацыю рамана Льва Талстога гледачы ўбачаць у лістападзе. Выканаўцы на партыі Ганны, Аляксандра Аляксандравіча і Уронскага ўжо зацверджаныя. Танцаваць "Карэніну" будуць два саставы салістаў.

Для Вялікага - гэта першая "Ганна Карэніна" ў рэпертуарнай афішы. Гісторыю нетрывіяльнага любоўнага трохвугольніка на музыку Чайкоўскага ставіць Вольга Косталь, выхаванка мастацкага кіраўніка тэатра Валянціна Елізар'ева. Харэаграфічны тэкст мільгае танцавальнымі маналогамі, масавымі сцэнамі і складанымі дуэтамі. Хрэстаматыйны раман у Вялікім - аўтарскі спектакль са стылістычна насычанай харэаграфіяй, тэмпавымі і сілавымі падтрымкамі. Вобразы да спектакля знаходзяцца ў распрацоўцы, у тэатры ўжо правялі першыя прымеркі. Усе касцюмы будуць стылізаваныя пад эпоху.

У зацверджаным выканальніцкім складзе - новаспечаныя народныя і заслужаныя артысты Беларусі. Так, зорная партыя Ганны Карэнінай, якая ў свой час зрабіла кар'еру Маі Плісецкай, за Ірынай Яромкінай. Прыма Вялікага і па сумяшчальніцтве шматдзетная маці, якая ўвасобіла на пуантах звыш 40 роляў, перад сусветнай прэм'ерай праводзіць гадзіны ў рэпетыцыйнай зале. 

Ён - Меркуцыа з "Рамэа і Джульеты", Франдоса з "Лаўрэнсіі" і Мадэст з "Анюты". За гады, праведзеныя на вялікай сцэне Канстанцін Гяронік даказаў не толькі гледачу, але і самому сабе, што з'яўляецца шматхарактарным выканаўцам. У новым сезоне заслужаны артыст ізноў зменіць вобраз. У "Карэнінай" Гяронік станцуе ў партыі Левіна, персанажа ў якім Талстой зашыфраваў вобраз самога сябе. 

Вялікі падніме заслону 15 верасня. 87-ы тэатральны сезон адкрыюць прэм'ернай пастаноўкай "Князя Ігара". У гэтым жа месяцы на беларускай сцэне ў рамках Дзён культуры чакаем Пекінскую оперу.