Гэтая опера гучыць у культавай гангстарскай драме "Хросны бацька", а ў гонар аднаго з яе персанажаў нават названы астэроід! Вялікі тэатр Беларусі ставіць легендарны "Сельскі гонар" італьянскага кампазітара П'етра Масканьі. Для трупы гэта ўжо 4-я рэдакцыя класічнага твора. Прэм'ера - 30 красавіка, пакуль жа ўсе цэхі найбуйнейшага тэатра краіны рыхтуюцца да першага паказу спектакля. Аб працы над пастаноўкай сіцылійскай крымінальнай драмы - рэпартаж Іны Пілевіч.
Дэкарацыі - перафарбаваць! За тры тыдні да прэм'еры галоўны мастак Вялікага тэатра зноў адпраўляе сцэнічнае афармленне на перапрацоўку. Паводле задумкі, жоўты колер павінен выглядаць сонечным. Менш чым праз месяц тут, на галоўных акадэмічных падмостках краіны, пад яго кіраўніцтвам вырасце італьянская вёска 20-х гадоў 20-га стагоддзя.
Італьянская гісторыя ад італьянскага кампазітара П'етра Масканьі. Усе службы Вялікага занятыя падрыхтоўкай да першага паказу адной з самых запатрабаваных опер у свеце - "Сельскага гонару". Толькі ў "Метраполітэн опера" класіку давалі 650 разоў.
А культавы амерыканскі кінарэжысёр Фрэнсіс Форд Копала ўплёў "Сельскі гонар" у гангстарскую сагу "Хросны бацька".
Опера з максімальнай канцэнтрацыяй дзеяння. Падзеі разгортваюцца ў межах адной раніцы. Гісторыя адбываецца ў велікодную нядзелю. Таму адной з цэнтральных дэкарацый спектакля стане сіцылійская царква.
Велікодная гісторыя кахання і здрады. Сюжэт аб двайной маралі - галоўныя героі моляцца, а потым грашаць. Канфлікт разгортваецца на фоне масавых сцэн, духоўнай і народнай харавой музыкі. Ставіць "Сельскі гонар" галоўны рэжысёр тэатра Міхаіл Панджавідзэ. Класіка толькі на мове арыгінала.
4-я рэдакцыя "Сельскага гонару" для Вялікага. У 1979-м партыю Сантуцы ў Мінску выконвала сама прыма маскоўскага Вялікага Алена Абразцова. Тут рыхтавалася для выступлення ў "Ла Скала".
У архіве тэатра дагэтуль захоўваецца падзячная паштоўка.
Гісторыю спектакля вырашана захаваць. Два дзясяткі касцюмаў з папярэдніх пастановак адрэстаўраваныя і дапоўненыя новымі элементамі. Уборы галоўных герояў Турыду, Лолы, Лючыі распрацавалі зноў. Швачкі робяць апошнія шыўкі. Ужо праз 2 тыдні артыстам у касцюмах выходзіць на галоўную сцэну для фінальных рэпетыцый.
