Гэты спектакль больш за 100 гадоў назад зрабіў фурор у свеце балета, а выконваць у ім партыі лічылася за гонар. Вялікі тэатр Беларусі пачаў пастаноўку "Пятрушкі" Стравінскага. У якасці рэжысёра запрошаны зорка сусветнай сцэны, прадстаўнік знакамітай балетнай дынастыі Андрыс Ліепа. Народны артыст Расіі сам не раз увасабляў на падмостках "Пятрушку", а зараз ставіць легендарны балет па ўсім свеце. Мая калега Іна Пілевіч прадоўжыць.
Госць, якому не патрэбна суправаджэнне. У заблытаных калідорах беларускага Вялікага Андрыс Ліепа як свой. Крыху больш за тры дзясяткі гадоў назад у Мінску рыхтаваўся да свайго міжнароднага трыумфу. Пастаўлены нумар прынёс выканаўцу Гран-пры на конкурсе ў ЗША.
Андрыс Ліепа, народны артыст Расіі, рэжысёр: "У гэтай зале мы працавалі з Нінай Ананіяшвілі ў 86-м годзе, калі Елізар’еў паставіў для нас нумар "Настрой". Я зайшоў, і як быццам акунуўся на дзесяцігоддзі назад. Я, наадварот, сюды імкнуся, і пры любой магчымасці буду выступаць, паказваць".
Зорка сусветнага балета больш не танцуе. Андрыс Ліепа прыляцеў у Мінск з Нью-Ёрка ўжо ў якасці рэжысёра. Ставіць класіку - "Пятрушку" Стравінскага.
Прэм'ера гэтага спектакля на знакамітых рускіх сезонах Дзягілева зрабіла сапраўдны фурор. А пасля выканаўцы галоўнай партыі імгненна станавіліся вядомымі, сярод іх і сам Ліепа. Сёння народны артыст не будзе ўносіць праўкі ў шэдэўр. Аднаўляе спектакль, грунтуючыся на арыгінальнай харэаграфіі балетмайстра Міхаіла Фокіна. Пятрушка з сумным тварам і нязграбнай пластыкай - як сімвал рускага балетнага авангарда.
Андрыс Ліепа, народны артыст Расіі, рэжысёр: "Унучка Фокіна нам дала клавір. Клавір Міхаіла Фокіна, які застаўся ў іх у архіве, якога яго рукой распісаны. Падпісаныя дэталі пастаноўкі. Гэта важна і з пункту гледжання самога дзейства, што калі адбываецца".
Рэканструкцыя ад харэаграфіі да касцюмаў. Сцэнічныя ўборы будуць максімальна набліжаныя да першага паказу спектакля. Каб атрымалася як стагоддзе назад у мастака Бенуа, у пашывачныя цэхі Вялікага тэатра ўжо перададзеныя эскізы.
У "Пятрушку" балерыны прамяняюць пуанты на валёнкі. Такі нетыповы для балета абутак абумоўлены сюжэтам спектакля, які разгортваецца ў Масленічны тыдзень. Усяго ж, каб стварыць на сцэне свята провадаў зімы, будзе пашыта 90 касцюмаў.
Балет-вуліца. Сярод персанажаў калядоўшчыкі, гусары, вазніца, катрыншчык, купец. Гледачам абяцаюць і сапраўдную казку. Менавіта паводле рускіх народных фантастычных твораў ужо ствараюцца дэкарацыі будучай прэм'еры. Сцэнічныя карціны пішуць у стылі лубок - яркімі фарбамі ствараюць простыя і даступныя вобразы рускай народнай творчасці.
Андрыс Ліепа ў Мінску да 17 красавіка. У адсутнасць майстра артысты прадоўжаць працаваць над спектаклем з рэпетытарамі. Наступны візіт рэжысёра-пастаноўшчыка запланаваны на май - спецыяльна да ўрачыстасцяў з нагоды 85-годдзя тэатра. Прэм'ера ж балета "Пятрушка" ўжо заяўлена на 6 чэрвеня.
