Белтэлерадыёкампанія аб'яўляе пра старт нацыянальнага адбору на "Еўрабачанне-2020"

Па інфармацыі Telegram-канала ATN_NEWS, прадзюсарская група медыяхолдынга адкрыла прыём заявак на ўдзел у нацыянальным адборачным туры конкурсу песні "Еўрабачанне-2020". 

Падаць заяўкі можна ў электронным выглядзе да 17 студзеня 2020 г. на афіцыйны сайт кампаніі  www.tvr.by. Пасля гэтага фокус-група Белтэлерадыёкампаніі правядзе перадкастынг музычных кампазіцый і сфарміруе спіс удзельнікаў жывога праслухоўвання. Спіс канкурсантаў, дапушчаных да праслухоўвання, будзе апублікаваны на сайце арганізатара не пазней за 22 студзеня. 

Праслухоўванне запланавана на 27 студзеня, па яго выніках наступная фокус-група простай большасцю галасоў вызначыць да дванаццаці ўдзельнікаў фіналу праекта (колькасць фіналістаў можа быць зменена рашэннем арганізатара самастойна або па прапанове фокус-групы). 

Падчас правядзення праслухоўвання на сайце Белтэлерадыёкампаніі www.tvr.by будзе ажыццяўляцца анлайн-трансляцыя. 

Фінал пройдзе не пазней за 6 сакавіка 2020 г. у фармаце шоу ў прамым тэлевізійным эфіры на каналах "Беларусь 1" і "Беларусь 24". Пераможца вызначыцца па выніках галасавання прафесійнага журы і  гледачоў. 

Фіналіст, які набраў найбольшую колькасць балаў, будзе аб’яўлены пераможцам нацыянальнага адборачнага тура і на правах афіцыйнага прадстаўніка ад Беларусі пачне падрыхтоўку да ўдзелу ў "Еўрабачанні-2020".

Праект праводзіцца Нацыянальнай дзяржаўнай тэлерадыёкампаніяй Рэспублікі Беларусь (арганізатар) як адзіным у нашай краіне членам Еўрапейскага Вяшчальнага Саюза (ЕВС) і Міністэрствам культуры Рэспублікі Беларусь (суарганізатар) у адпаведнасці з палажэннем, распрацаваным арганізатарам, і правіламі конкурсу, устаноўленымі ЕВС. 

Палажэнне аб праекце размешчана на афіцыйным сайце арганізатара www.tvr.by 

Юбілейны, 65-ты конкурс песні "Еўрабачанне-2020" пройдзе ў маі ў Ратэрдаме (Нідэрланды). Паўфіналы адбудуцца 12 і 14 мая, фінал - 16.