У стварэнні фільма пра Ван Гога прынялі ўдзел сотні мастакоў, у тым ліку і беларуска.
"З любоўю, Вінсент". У стварэнні ўнікальнага па стылі анімацыйнага фільма пра Ван Гога прынялі ўдзел сотні мастакоў з усяго свету. Сярод іх брэсцкі майстар Марыя Радзько. Яны працавалі ў Польшчы і Грэцыі. Вялізная каманда працавала над фільмам шэсць гадоў. Прэм'ера адбудзецца ўжо вясной. Што засталося за кадрам, раскажа Вікторыя Патоня.
Марыя Радзько, мастачка:
"За дзень я паспявала самае вялікае 12 кадраў намаляваць, гэта значыць адну секунду. Для гэтага трэба проста не ўставаць з месца, каб вось так маляваць".
Марыя Радзько гэты досвед не забудзе ніколі. Працаваць над унікальным праектам даводзілася шмат. Працаваць у якасці аніматара прыйшлося ўпершыню. За тры з паловай месяца ў майстэрнях Гданьска і Афін мастачка стварыла каля 300 карцін. У агульным хронаметражы кінастужкі гэта крыху менш за хвіліну. Марыя прызнаецца: было няпроста, аднак дзякуючы гэтай працы яна адкрыла ў сабе новыя творчыя грані.
Бюджэт фільма - каля 5 млн еўра. На яго стварэнне спатрэбілася 6 гадоў. Усяго ж кінастужка складаецца з 60 тысяч уручную намаляваных твораў, прычым напісаных як быццам самім Вінсентам. Спачатку сюжэт знялі на камеру, а затым кожны кадр на палатно пераносілі амаль сто аніматараў.
Для брэсцкай мастачкі стыль постімпрэсіянізму, у якім і маляваў свае карціны Ван Гог, аказаўся блізкі. Магчыма, таму для Марыі Радзько не так складана было капіраваць тэхніку прызнанага генія. Дарэчы, пераканацца ў гэтым можна на персанальнай выставе мастачкі, арганізаванай у адным з кафэ горада.
Для Марыі гэта каласальны досвед, дзякуючы якому яна іншымі вачамі паглядзела на творчасць апантанага галандца.
Марыя Радзько, мастачка: "Да працы над гэтым праектам у мяне было стаўленне да Ван Гога як да вельмі распіяранага мастака, які не мае вялікіх падстаў для такой славы. І я яго менавіта як чалавека палюбіла. А праз гэта палюбіла яго працы".
"З любоўю, Вінсент!" - першы анімацыйны фільм пра Ван Гога, зняты ў поўным метры. Прэм'ера чакае гледачоў ужо вясной 2017-га.
