Беларусь выбрала голас дзіцячага "Еўрабачання"

22 Верасня 2019

Лізавета Міснікова прадставіць нашу краіну на прэстыжным міжнародным форуме ў Польшчы. Дарэчы, краіна-суседка прымае конкурс упершыню. А наша дэлегацыя адправіцца на дзіцячае "Еўрабачанне" ўжо 17-ты раз - Беларусь удзельнічае ў песенным шоу з моманту яго заснавання.

Двойчы конкурс прымала "Мінск-Арэна". Цяперашні фінал у студыі "600 метраў" нагадваў сапраўдны дзявочнік. Упершыню ў гісторыі праекта выніковы гала-канцэрт гучаў выключна дзявоцкімі галасамі. На еўравізійную пуцёўку прэтэндавалі 10 фіналістак: 8 сольных выканаўцаў і 2 вакальныя бэнды. Пераможніцу выбіралі шляхам змяшанага галасавання – з улікам меркавання нацыянальнага журы і тэлегледачоў.

Выдатніцай, паводле версіі і тых, і другіх, стала Лізавета Міснікава. Вакалістцы паставілі адразу дзве дзясяткі. З танцавальным хітом "Попельны", які напісалі Кірыл Гуд і Наталля Тамбоўцава, Ліза адкрывала гала-канцэрт, выйшла на сцэну пад нумарам адзін і стала першай у нацадборы. Для выканаўцы цяперашні сезон стаў апошнім прахадным на дзіцячае "Еўрабачанне", бо ёй ужо споўнілася 14 гадоў. Раней яна тройчы штурмавала нацыянальны кастынг, а сёлета ёй усё ж удалося забраць яго галоўны трафей - стылізаванае сэрца.

Дзяўчынка вучыцца ў музычнай школе і займаецца харэаграфіяй, а сярод куміраў Лізы амерыканская выканаўца Рыяна. Да лістапада кожны дзень вакалісткі распісаны. Каманда прадстаўніцы Беларусі на дзіцячым "Еўрабачанні-2019" ужо пачала рыхтаваць нумар да міжнароднага эфіру. Магчыма, песню "Попельны" на конкурсе пачуем у акустычнай версіі.

Пажадаем Лізавеце ўдачы.