Сёння Беларусь выбера свайго прадстаўніка на дзіцячым конкурсе песні "Еўрабачанне-2017". Фіналістаў 10. Рашэнне па традыцыі прымуць журы і тэлегледачы. Напярэдадні ўвечар прайшла першая рэпетыцыя з тэлекамерамі. Ніна Мажэйка зазірнула ў закуліссе і нават убачыла галоўны прыз нацыянальнага адбору.
Рэпетыцыя ў зусім недзіцячы час. Да паўночы ў студыі "600 метраў" ішоў прагон з фіналістамі. Пад прыцэлам 9 камер.
Рэпетыцыя ў касцюмах, але без грыму. Вакол артыстаў вялізная світа: бацькі, педагогі, спецыялісты Белтэлерадыёкампаніі. Іх патэнцыял накіраваны на тое, каб зрабіць шоу максімальна відовішчным. За прыгожы малюначак тут адказвае рэжысёр трансляцыі. Гэты чалавек ведае ўсе нюансы нумароў фіналістаў - гэта яго праца.
Штогод сцэна адбору змяняе свой дызайн. Студыя "600 метраў" - рабочая тэлепрастора, якая пастаянна выкарыстоўваецца і мадыфікуецца. Таму статычных дэкарацый тут няма. Шматтоннае абсталяванне прывезлі напярэдадні рэпетыцый. Вынік - сучасная сцэна, зробленая паводле апошніх тэндэнцый.
Насамрэч, тут, у студыі "600 метраў", усё настолькі тэхналагічна, што нават сімвал дзіцячага "Еўрабачання" лёгка ўпісваецца ў інтэр'ер і, больш за тое, бярэ на сябе дызайнерскія функцыі. Фіналісты выступаюць пад сонцам. Зусім не асвятляльную нагрузку на сябе ўзяла вось гэтая люстра з святлодыёдных экранаў.
Учора на першай тэхнічнай рэпетыцыі выставілі гук. Настройкі пад кожнага з фіналістаў індывідуальныя - захоўваюцца ў сістэме. Некаторыя з юных артыстаў упершыню выкарысталі вушныя маніторы на сцэне. Прадумана і пастаноўка кожнага з фіналістаў - для дакладнасці ёсць святлодыёдныя пазнакі на сцэне. Яны дапамагаюць аператарам трымаць план сапраўды ў цэнтры кампазіцыі.
Хто прадставіць краіну на конкурсе, вырашаць журы і тэлегледачы. Галасаванне па традыцыі пройдзе ў фармаце 50 на 50. А галоўны трафей конкурсу - хрустальнае сэрца. Прыз з геаграфічнай дасылкай да месца правядзення "Еўрабачання". Гэта горад Тбілісі. Каго дарога адбору прывядзе ў Сакартвела, даведаемся ўжо сёння ўвечар.
