Літаральна некалькі гадзін таму Юзары і Маймуна завяршылі запіс новай версіі кампазіцыі "Тайм". Акрамя таго, прадстаўнікі нашай краіны ў апошні тыдзень актыўна працавалі над піяр-стратэгіяй. Бо музычныя крытыкі сыходзяцца ў меркаванні - сёлета гледачоў "Еўрабачання" адной песняй не здзівіш. Аб апошніх падзеях у падрыхтоўцы Юзары і Маймуны - Яўген Перлін.
Скрыпка ў песні "Тайм" зараз зайграе па-новаму. Гучанне інструмента Маймуны не змянілася, гэта ўсё тая ж легендарная скрыпка сярэдзіны 19-га стагоддзя, але вось яе партыя стала больш яркай.
У найбліжэйшыя дні Юзары абновіць і сваю партыю. Педагог па вакале сказаў, што варта злёгку адкарэкціраваць акцэнт. І адразу пасля запісу Юзары і Маймуне патрэбна будзе ствараць кліп. Гэты ролік да "Еўрабачання" і будуць трансліраваць у 40-ка краінах Еўропы.
У конкурсе здымачных груп удзельнічалі 19 прадакшн-кампаній. Выбралі беларускую каманду. І, мяркуючы па сцэнарыі, кліп будзе поўны спецэфектаў, амаль як у фільме "Матрыца".
У пачатку наступнага тыдня ў павільёне пабудуюць вялізны пясочны гадзіннік. Ад здымак на вуліцы адмовіліся з-за далікатнага стаўлення да інструмента Маймуны. Скрыпка баіцца холаду!
Затое распрацоўкай сцэнічных касцюмаў для нашых удзельнікаў "Еўрабачання" займаюцца беларускія мадэльеры. У Маймуны плануецца жоўтая сукенка. Яе верхняя частка сімвалізуе пасыл да будучыні, а ніжняя - распад мінулага. Ва ўборы зашыфруюць і ініцыялы артыстаў - U&M. А ў Юзары касмічная тэматыка ў колеры - цёмны графіт.
Кіраўніцтва Белтэлерадыёкампаніі зараз вызначаецца і з промапрадукцыяй. Дызайнеры распрацоўваюць крэатыўнае афармленне. Самае цікавае, што Юзары і Маймуна не павязуць на "Еўрабачанне" ніводнага музычнага дыска, бо гэта ўжо нямодна.
Maimuna, прадстаўніца Беларусі на "Еўрабачанні-2015": "У нас будзе флешка ў форме гадзінніка. Там будзе шмат цікавага матэрыялу пра нас. Флешку можна выкарыстаць для сябе і праглядзець цікавыя моманты пра нас. Але гэты матэрыял нельга выдаліць".
І яшчэ адзін промападарунак - гэта магніцік у форме пясочнага гадзінніка і з лагатыпам беларускіх выканаўцаў. Юзары і Маймуна вельмі спадзяюцца, што гэты сувенір у канцы мая будзе адлічваць час ужо да "Еўрабачання" ў Мінску. І тут магія не перашкодзіла б.
