Анімацыйны фільм аб жыцці беларускага мастака, які стаў здабыткам сусветнага мастацтва, гатовы. "Марк Шагал. Пачатак" - гэта першы праект такога плана, які падрыхтавала нацыянальная кінастудыя. 97 гадоў, якія пражыў Шагал, змясцілі ў 13 хвілін. Чыім голасам гаворыць майстар пэндзля - пачула Алена Борматава.
"Мая біяграфія" аўтарства Шагала легла ў аснову стварэння анімацыйнага фільма. Падарожжа па пачуццях, адчуваннях, перажываннях мастака доўжыцца 12 хвілін 59 секунд. Вялізная колькасць герояў - ад бацькоў Шагала да яго сяброў, пра якіх распавядае сам мастак, агучана адным чалавекам - Дзмітрыем Астраханам.
Алена Пяткевіч, рэжысёр анімацыйнага фільма "Марк Шагал. Пачатак": "Усё зроблена як сон і за ўсіх сваіх дарагіх і родных ён гаворыць аўтарскім тэкстам. Я вельмі баялася, але гэта вельмі правільнае рашэнне - тыя інтанацыі, якія ён перадае ў сваёй аўтабіяграфіі, яны вельмі добра ўплятаюцца ў тканіну гэтага фільма".
У фільме вельмі шмат гукаў Віцебска - крокі па маставой, стракатанне цыкад, трэск пажару. З горадам, у якім нарадзіўся Шагал, звязаны і шматлікія людзі з творчай групы праекта - гукааператары, мастакі.
Апошнія працавалі пад кіраўніцтвам Алы Мацюшэўскай - мастака-пастаноўшчыка. Яе эскізы, па якіх распрацаваны асноўныя фазы праекта, - персоны, прадметы побыту, краявіды - усё, што ажывае ў фільме, адкрыта для шырокага доступу. Як ствараўся мультфільм, можна ўбачыць на выставе ў музеі кіно.
У фільме няма ні адной арыгінальнай работы Шагала - толькі мастацкая выдумка, спрабавалі трапіць у стыль мастака.
Акрамя таго, у экспазіцыі прапанаваны арыгінальныя работы мастакоў праекта, натхнёных творчасцю мастака, паэта і пісьменніка.
Мультыплікацыйны фільм "Марк Шагал. Пачатак" у прамым сэнсе стаў пачаткам стварэння анімацыйнага серыяла аб мастаках-беларусах, якія сталі здабыткам сусветнага мастацтва. Каму з майстроў будзе прысвечана другая серыя праекта, пакуль не вядома.
Праца над праектам заняла 9 месяцаў. Афіцыйная прэм'ера першай серыі мультсерыяла пройдзе на працягу месяца. Зараз жа разглядаецца пытанне аб удзеле анімацыйнага фільма аб Шагале ў розных сусветных фестывалях і правядзенні выставы ў Віцебску. Не выключана магчымасць дэманстрацыі мультфільма і экспанавання эскізаў да праекта ў Францыі.
