На беразе Дняпра ідуць апошнія падрыхтоўкі да маштабных гулянняў. На восьмым фэсце чакаюць рэкордную колькасць гасцей - звыш за сто тысяч. На месцы падзей працуе наша здымачная група.
Што зараз адбываецца ў Александрыі - даведаемся ў нашага карэспандэнта Аляксея Марцінёнка (прамое ўключэнне).
Добры дзень, калегі! Александрыя прымае ўжо сёмае Купалле, і з кожным годам тут, на беразе Дняпра, становіцца ўсё больш цікава, разнастайна і маштабна. І кожны год арганізатары імкнуцца замахнуцца на нейкі новы рэкорд. У 2015-м гэта быў 50-метровы купальскі пояс, у 2016-м адбыўся рэкорд наведвальнасці: тут пабывалі каля ста тысяч чалавек.
А галоўная асаблівасць гэтага года ў тым, што свята стала па-сапраўднаму міжнародным. На беразе Дняпра, які злучае тры братэрскія народы - беларусаў, расіянаў і ўкраінцаў, гэтым разам сабраліся артысты, музыканты і майстры мастацтваў з Літвы, Латвіі, Эстоніі, Польшчы і Германіі. Нямецкі музыкант Ціна Айсбрэнер выступіць з сольным канцэртам. Ён, дарэчы, вядомы як заўзяты пацыфіст і ўдзельнік антываенных акцый. Так што, шоу абяцае быць вельмі актуальным. Зрэшты, тут прадстаўнікі кожнай краіны імкнуцца пазнаёміць гасцей і са сваімі абрадамі і, вядома, частуюць нацыянальнымі стравамі.
І Беларусь абавязкова сёння прадэманструе ўсім, што такое сапраўднае Купалле. Упершыню тут арганізуюць пазнавальную квэст-гульню "У пошуках кветкі папараці". А спецыяльны конкурс вызначыць лепшага ў вырабе купальскіх вянкоў. Забаўкі на любы густ. Разнастайныя гульні для дзяцей, а дарослыя ўжо ў прадчуванні шоу парашутыстаў, якое пачнецца праз некалькі гадзін.
Цэнтральнай падзеяй гэтым разам стане міжнароднае эстрадна-цыркавое шоу "Купалле крочыць па планеце", якое завершыцца маштабным парадам феерверкаў і лазерным шоу. А далей у праграме - сапраўдны падарунак для моладзі. Этнадыскатэка з удзелам лепшых дыджэяў краіны, якая падоўжыцца да самай раніцы. Вядома, яшчэ ёсць час для таго, каб далучыцца да гэтага свята. Усё самае цікавае пачнецца на заходзе сонца.
Дарэчы, магілёўцам пашанцавала ледзь больш, чым астатнім гасцям: ім не варта хвалявацца наконт таго, як потым дабрацца дахаты. Сёння менавіта для зручнасці гасцей свята было прынята рашэнне ўначы падоўжыць працу грамадскага транспарту.
