Міжнародны фэст - свята народнай творчасці зноў пройдзе на беразе Дняпра. Мерапрыемства традыцыйна наведае Прэзідэнт Беларусі Аляксандр Лукашэнка.
Сёння аграгарадок ператворыцца ў адну вялікую канцэртную пляцоўку. Паўтары тысячы артыстаў з сямі краін, у тым ліку - з Расіі, Украіны, Прыбалтыкі, Польшчы і Германіі прапануюць свае народныя традыцыі (творчасць і пачастункі). Фэставая пляцоўка сёлета пашырэла. Гасцей чакае насычаная праграма гулянняў: горад рамеснікаў, нацыянальная кухня, падворкі. Тут можна набыць сувеніры і нават папарыцца ў сапраўднай лазні. Фіналам грандыёзнага шоу стане святочны феерверк.
Заўтра свята прадоўжыцца. У нядзелю ў Александрыі - Дзень культуры Украіны.
Творчы дэсант украінскіх артыстаў упершыню выступіць на свяце Купалле. Акрамя таго, на вуліцах аграгарадка разгорнецца "Сарочынскі кірмаш" - з нацыянальнымі рамёствамі і вышыванкамі. Таксама гледачоў чакае перформанс ад коннага тэатра "Кіеўская Русь" і канцэрт майстроў мастацтваў Украіны. Спецыяльна для яго тэхнічная каманда прывезла эксклюзіўнае абсталяванне.
Аграгарадок Александрыя - не апошні пункт вялікага тура. Дэлегацыя адправіцца ў Гомель, а таксама Віцебск. Украінскія артысты прымуць удзел у канцэрце-адкрыцці Міжнароднага фэсту мастацтваў "Славянскі базар у Віцебску", а таксама выступяць у канцэрце "Рытмы лета"
